Batid na si Roxas sa panerbisyo

Mikalit lang og kamingaw ang isyu batok ni Vice President Jejomar Binay. Ang mipuli karon mao ang kalit nga pagsulbong sa kainila ni Senador Grace Poe ug ang sugyot nga angay sila'ng magtandem ug ni DILG Secretary Mar Roxas sa pagka presidente ug bise presidente unya sa 2016.

Kun ako ang pahimuon og sugyot pabor ko nga si Mar Roxas maoy modagan sa pagka presidente sa nasud ug bise lang usa si Grace Poe bisan og nahimong mas inila siya karon sa gihimo'ng mga survey.

Abi ninyo'g ngano? Para kanako, si Grace Poe bag-o pa kaayo sa politika. Sa laktud, wala pa kaayo siya'y kasinatian sa pagpadagan sa kagamhanan.

Una pa kini nga higayon nga nahimo siya nga senador, dili sama ni Roxas nga banggiitan na sa pagmugna og mga balaud, ug suheto na usab sa pagdumala sa executive department kay nahimo na siya nga secretary sa DOTC, DTI ug DILG.

Aw hinuon, depende na kana sa kadagkoan sa Liberal Party kun kinsa ang ilang padaganon nga morepresentar sa ilang partido. Basta alang kanako, mas makabentaha g'yud ang Partido Liberal kay sa United Nationalist Alliance (UNA).

Ang kandidato sa UNA nga si Vice President Binay naputos sa mga bati kaayo nga report kabahin sa pagduda nga siya nakapangawkaw og kuwarta sa kagamhanan pinaagi sa pagpa-overprice sa mga proyekto nga gipatuman sa Makati diha'ng siya pa ang mayor.

Kini'ng isyuha wala pa gayud mahatagi og katin-awan. Samtang si Roxas, kun matinuod man nga mao kini ang ikaatbang ni Binay wala kita makadungog nga nalambigit siya'g binuang sa kagamhanan.

* * *

Puwerte'ng sukoa ni Mayor Michael Rama nga giaprobahan man tuod sa konseho ang daku-dako nga budget para sa sunod tuig apan adunay pipila ka kondisyon.

Gipatun-an ni Mayor Michael Rama kang City Legal Officer Jerone Castillo ang pagpasaka og kaso ngadto sa mga konsehal nga misuporta nga butangan og mga kondisyon ang pag-aprobar sa budget.

Ang P13 Bilyones nga budget nga giaprobahan sa Cebu City Council kaniadtong Sabado, in mass motion nga sa ato pa tanan g'yud nga mga konsehal, adunay mga kondisyon nga gibutang.

Kini sama sa kondisyon nga dili mapatuman ang daghang infrastructure projects kon ang dakbayan sa Sugbo dili makabaligya sa lima ka parsela sa yuta diha sa South Road Properties nga gihimo'ng funding source sa budget.

Gusto sa mga konsehal, ilabi na sa mga sakop sa Committee on Budget and Finance, nga unahon ni Mayor Rama sa pagpatuman ang mga priority projects dili kay ang pagpatukod og mga building.

Buyno, paabuton nato kun idayon ba gayud ni Mayor Rama ang pagpasaka og kaso nga Abuse of Authority kay matud niya dako nga pagpangabuso ang gihimo sa mga konsehal nga manghilabot sa trabaho sa executive department.

* * *

Kun mahinayon ang pagtapon ni Konsehal Mary Ann De Los Santos gikan sa Team Rama paingon sa Bando Osmeña Pundok-Kauswagan, makasinati g'yud og dako'ng problema si Mayor Rama.

Bisan pa og ang usa ka suod ni Mayor Rama moingon nga walay epek ang pagtapon ni Mary Ann sa BOPK, apan ang tinuod dako kaayo kini nga problema sa Team Rama.

Si Mary Ann adunay balwarte nga mao ang Lahug diin kapin sa 5,000 ka botante ang "die hard" kaayo kaniya. Ang labaw ni Mayor Rama nga kapin sa 5,000 kang kanhi Mayor Tomas R. Osmeña diha nga nagkasangka sila sa miagi'ng eleksyon, sayon ra kaayo kini kuhaon diha lang sa Lahug.

Mas maayo ni Mayor Rama nga badlongon niya ang iyang suod nga kusog kaayo nga mopasakit og sulti kay imbes mahawiran pa nila si Mary Ann, tulin pa kini sa manatad nga motalikod sa Team Rama.

* * *

Sa kagrabe na karon sa problema sa trapiko, angay na gayud nga ipatuman na pagbalik ang towing operations. Kinahanglan nga guroyon ang mga sakyanan nga ipataka lang og parking sa ilang mga tag-iya diha daplin sa karsada nga makabalda sa dagan sa mga sakyanan.