Padaghanay sa sakyanan

Kon basehan ang rekord sa Land Transportation Office nga 47 ka sakyanan ang marehistro matag adlaw, makaangkon ta og ideya sa usa sa di malalis nga hinungdan sa paghuot pag-ayo sa atong kadalanan: Sa usa ka semana, dul-an sa libo ka sakyanan ang madugang sa kadalanan; sa usa ka tuig, kapin sa 11 mil ka sakyanan ang mapuno.

Ang kapaspas sa pagdaghan sa mga sakyanan sa Pilipinas (6%) mas tulin kay sa pagburot sa nasudnong populasyon (2%) matag tuig. Mas nabiyaan ang pagtukod og bag-ong kadalanan ug ang pagpalapad sa karaang mga agianan. Maong mora ta og inanay nga gilumsan sa di kapugngan nga pagbaha sa dugang mga sakyanan.

***

Mas natuok ta sa trapiko sa niaging mga adlaw tungod sa pagsulbong sa kalihokan pagsugat sa nagkaduol nga Pasko ug bag-ong tuig. Hapit tanang anak sa singot nakadawat na sa ilang 13th month pay ug bonus ug busa nakabuylo na sa pagpamalit sa ilang mga panginahanglan.

Gidunganan sa daghan uyamot nga sale ug ubang promo sa labing dagkong mga tindahan ug mga kan-anan pagseguro nga masipong dayon nila ang mga pinaskohan sa mga konsumidor. Gawas sa pagsulbong sa mga lakaw sa mga pasahero, nagkadungan sab ang mga tag-iya sa pribadong mga sakyanan pagpanggawas alang sa ilang mga lakaw hangtod sa lawom nang gabii ug sayong kadlawon.

***

Sukad sa pagsugod og huot sa trapiko pila ka tuig nang nilabay, napugos ko pagtuman sa lagda nga di na ko molugsong sa Dakbayan sa Sugbo gawas lang kon may di kalikayan nga mga lakaw. Maong nagkataas nang listahan sa mga tigpasiugda og mga tigom nga akong gipangayoan og pasaylo ug gihatagan og bisan unsa na lang hinungdan.

Nitambong ko og party niadtong Martes sa gabii kay gawas nga di kabalibaran ang nagsaulog nagsalig sab kong mas luag nang trapiko. Hapit nang tungang gabii ming nakauli. ug, nakatag-an ka, labihang huota pa sa mga sakyanan sa highway sa Mandaue.

***

Bisan sa kabantang sa hulga sa kadaghan sa mga sakyanan, nga segun sa National Statistical Coordination Board mga motorsiklo ug pribadong mga sakyanan ang kinabag-an, way gihimo ang lokal nga mga opisyal sa Sugbo pag-regulate sa pribadong mga sakyanan. Gawas sa truck ban.

Ma-regulate ang mga sakyanang pamasahero tungod sa ilang mga ruta. Kay wa man magsilbing odd-even ug color coding schemes sa Metro Manila, unsaon man pag-iban ang pribadong mga sakyanan sa labing huot nga kadalanan sa labing puno nga mga oras sa adlaw ug gabii dinhi sa ato? Angayng hinumdoman nga ang bisan unsang regulation sa pribadong mga sakyanan molampos lang kon ipasikad sa barato ug kasaligang mass transport system aron mabugnaw ang pagpadagan sa pribadong mga sakyanan.

[email protected]