Nakamenos ni Queenie

Dihang gipahibawo sa Pagasa nga may nakit-an silang low pressure area sa gawas sa Philippine Area of Responsibility sayo ning semanaha, way bisan usa sa mga Sugbuanon ang nabalaka. Kay kasagaran nila nag-antos sa labihan kaalimuot ug ang ilang mga tanaman nag-uga tungod sa kakuwang sa uwan.

Di na man unta bag-o ang kaigang dinhi sa ato. Apan mas lisod dawaton ang nalugwayan nga kainit kay Pagasa ra say nipahibawo nato nga tingtugnaw na unta karon. Niadto pang Oktubre nagsugod og sud sa Pilipinas ang bugnaw nga hangin gikan sa China ug Siberia. Apan natabonan ang katugnaw sa pagsugod na sa El Niño.

***

Maong ang pagdanga-danga sa LPA taliwa sa grabeng kaalimuot di sukaranan sa kabalaka. Kay Pagasa ra say niingon nga gamay rang kahigayonan nga mahimong bagyo ang LPA. Mahimo ganing mahilis sa di pa makatugpa sa yuta.

Gawas pa, ang kahigayonan nga ang LPA makahatag og uwan sa iyang pag-agi sa Sugbo ug Kabisay-an nagsaad og alibyo gikan sa kainit. Tingali maibanan og diyutay ang kaalimuot. Ug mabisbisan og gamay ang giuhaw nang mga tanaman ug mga umahan. Maong ang LPA wa hatagi sa importansiya nga iyang gikinahanglan. Wa kahanigi og tukmang pagpangandam. Ang mga dapit nga maagian naghambin man gani hinuon og gamayng kahinangop sa kabasa ug kabugnaw nga iyang bawon.

***

Dihang nakasud nang LPA sa PAR ug nagpaduol na sa Hinatuan, Surigao del Sur, wa gihapon mohimo sa tukmang pangandam ang mga buhatan sa gobyerno ug pribadong sektor. Nganong pangandaman man tuod nga gisublisubli man sa Pagasa nga gamay rang kahigayonan nga mahimong bagyo.

Dihang kalit lang nga nahimong tropical depression ang LPA ug ginganlan na og Queenie, mas gihatagan og importansiya ang kahinay sa iyang hangin--45 ka kilometro matag takna--nga di makahulga sa atong mga panimay ug kabtangan. Dihang gigakotan nang mga barko kay giisa nang Public Storm Warning Signal No. 1, mao pay pagkaamgo sa tanang hingtungdan nga tingali tinuod nga hulga ang naumol nga bagyo.

***

Bisan dihang nikusog si Queenie ngadto sa 55 ka kilometro matag takna, giisip gihapong mas hinay kay sa nangaging bagyo. Bisang pasidaan ni Pagasa Visayas Director Oscar Tabada nga daghan ug lapad ang uwan ni Queenie wa tugbangi sa naandang pagpakabana kay nagligiting pang adlaw sa Sugbo ug kasilinganang mga isla.

Dihang nisaka si Queenie sa Kabisay-an, gawas sa pipila ka opisyal nga nisuspenso dayon sa klase, kasagaran nalingaw nga naghinan-aw sa mga pangandam sa hinayng bagyo. Dihang nilabay si Queenie sa Bohol ug habagatang Sugbo, may nikuwestiyon pa nganong gisuspensong klase nga pat-ak pat-ak ra mang uwan. Ang kalapad sa kadaot nga gibilin ni Queenie maoy labing klarong ebidensiya nga di kakumpiyansahan ang kinaiyahan.