Pag-isnab sa Santo Papa

Hangtod kanus-a ang kaparian sa Sugbo ug Pilipinas nga magpaka buta ug bungol sa dagkong kausaban nga gipasiugdahan ni Pope Francis? Hangtod kanus-a sila magpaka aron ingnon nga ang bisan unsang kausaban nga gipasiugdahan sa bag-ong liderato sa Simbahang Katoliko para salida lang ug nga di molahutay hangtod sa pagbanos sa mas tradisyonal nga Santo Papa?

Kun imong panid-an ang kalihokan sa labing dagkong mga haligi sa Artsidyosesis sa Sugbo, mora lang og wa silang kahibawo sa mas yanong kinabuhi nga gipuy-an ni Pope Francis. Sa wa niya pagpuyo sa palasyo sa Santo Papa. Sa iyang pagpili pagkaon uban sa labing yanong kaparian ug mga kawani sa simbahan nga iyang giabtan.

***

Bisan sa subli-subli nga pagwali ni Pope Francis nga ang simbahan angayng mopaduol pagbalik sa iyang kaugalingon sa katawhan pinaagi sa pagpuyo sa kaparian sa labing yano nga paagi, ang mga tagduma sa artsidyosesis niinsistir sa pagpabilin sa ilang mga palasyo ug luho nga mga kumbento.

Bisan napamatud-an na nga si Pope Francis, dihang kardinal pa sa Buenos Aires, nipili pagpuyo og apartment ug pagsakay og bus paingon sa iyang buhatan matag adlaw, nawili ang kaparian sa Sugbo sa pagtahan sa mahalon nilang mga sakyanan. Pipila nila nipasangil pa nga kutob ra sa press release ang kayano sa kinabuhi sa Santo Papa.

***

Kanus-a pa man ta makakita og mga pari sa Sugbo nga mangabang og bay ug maghikay sa ilang kaugalingong pagkaon? Kanus-a pa man ta makauban nila og sakay sa kagang-kagang nga multicab pagsungasong sa nagkamang nga dagan sa trapiko sa libaungon ug nagbaha nga kadalanan?

Kanus-a pa man ta makakita sa lokal nga kadagkoan sa simbahan nga moipon og kaon sa labing yanong mga kawani, inay nga magpaluto sa labing lamian nga mga putahe ug mokaon ginamit ang labing mahalong mga plato, kutsara, tinidor ug kutsilyo? Kanus-a pa man sila maikog sa mga parokyano ug mosugod pagsunod sa kayano sa Santo Papa?

***

Way police power si Pope Francis. Maong kutob ra siya sa pagwali ug pagpakita og mga sumbanan. Di siyang kaggapos sa mga pari gikan sa luho nga pagpuyo ni kapugos nila sa pakighiusa uban sa kinabag-an nga mga kabos. Bisan siya ang kalibotanong pangu sa Simbahang Katoliko, ang mga pari gawasnon nga moisnab ug mosukwahi niya. Pipila gani sa naigo nga mga opisyal sa simbahan nagsugod na og saway sa Santo Papa.

Pasagdan ba lang nato nga makawang ang kausaban nga gipasiugdahan ni Pope Francis? Wa ba lang tay himuon pagtabang pagduso sa iyang kawsa sa mas pagpaduol sa simbahan ngadto sa katawhan? Paundayonan ba lang gihapon nato ang naandan sa pipila ka kaparian nga pagpahimus sa ilang mga sotana ug katungdanan?

[email protected].