Negosyo diha sa OBO

Unsa ni? Ngano'ng adunay kawani sa Division for the Welfare of the Urban Poor nga maoy mokontrata sa pagpakonektar og kuryente sa mga mo-apply og electrical permit gikan sa ilang opisina?

Nasakpan nako kini kay ang akong silingan nahatagan og electrical permit, apan ang mga mitaud sa meter mipagarbo man pagtug-an nga gipadala kuno sila sa usa ka engineer.

Abi man nako og kinsa nga engineer. Dili man gud mao ang pagtaud unta sa mga sinugo sa engineer sa meter kay diha man mag-atubang sa agianan nga kun maglakaw ka ug adunay gipas-an, hayan masangit ngadto sa meter.

Diha nga ako'ng giingnan nga iliwag ug ipataas-taas, abtik man kaayo nga militok nga igo ra sila nga gipadala sa engineer. Naa diay kuno sa OBO ang mao nga engineer.

Daan pa lagi ko nga gamiton dayon nga negosyo sa ubang mapahimuslanon. Aprobahan man tuod ang application apan sabut-sabuton nga sila ang mopataud sa meter ug ubang kagamitan.

Hayahaya sa negosyo no? Sakpan na ang negosyo sa pipila ka kawani diha sa OBO. Mao diay nga lipay sila kaayo nga adunay Let There Be Light program. Hala, may higayon pa kamo sa paghinulsol kay bestado na ang inyong baraha.     

Unsa’y ikasulti niini sa akong amigo nga si City Engineer Jose Marie Poblete?

***

Nalipay ko kay panahon sa buntag daghan nga polis ug traffic enforcers ang gidistino sa Gorordo Avenue dapit sa eskena Sudlon Road, sakop sa Barangay Lahug.

Apan pastilan, mora man 'sab og mga kinhason nga susu. Ang gipasabot nako mao nga magpundok man sila nga ang atangan nila mao ra ang mga sakyanan nga mo-left turn gikan sa Sudlon paingon sa JY.

Dili ba maayo nga magbuwag-buwag mo pagbarug sa karsada aron badlongon ang mga motorista nga mo-U-turn sa Gorordo Avenue human moliko gikan sa Sudlon Road ug mobalik paingon sa JY?

Para kanako, walay kapuslanan ang inyong pagbarug-barug diha nga ang inyong bantayan kadto ra'ng mo-left turn. Kun adto kamo magbarug sa unahan nga bahin unya magkatag-katag mo, mapugngan pa ang pag-U-turn sa mga motorista.

"Common Sense" lang mga brod. Dili man gud ko ignorante kun unsaon pagdumala ang traffic mao nga makasaway ko sa higayon nga makakita ko og dili mao nga lihok.

Usahay, makakita ko sa traffic enforcer nga magtupad, unya tua sa atbang. Kun may mo-left turn ug dili motuman sa traffic sign, masakpan pa ninyo? Sa gihapon, kinahanglang gamiton nato ang utok brod.

***

Ang napulo ka andana nga Makati Science High School building nga gipatukod atol sa administrasyon ni Kanhi mayor Jejomar Binay nagkantidad ra g'yud diay og gibana-bana nga P348.3 milyones, dili P1.3 Bilyones.

Mao kini ang gibutyag ni Commission on Audit  Chairman Grace Pulito-Tan atubangan sa mga senador sa nagpadayon nga hearing sa pasangil nga adunay kurapsyon atol sa administrasyon ni Binay isip mayor sa Makati City.

Usa kini sa gitan-aw karon sa mga sakop sa Senate Blue Ribbon Sub-Committee apan wala gayud tambongi ni Binay. Kun mitambong pa si Binay makatubag unta siya sa mao nga pasangil.

Bisan si Tan naglibog kun ngano nga miabot sa P1.3 bilyones ang kantidad nga giingong nagasto sa pagpatukod sa mao nga science high school building.         

Hangtud karon wala pay clearance sa COA ang katukoran sa building nga nagpasabot nga nagpabiling kuwestyonable ang kantidad.

Kun si Binay walay labot sa giingong overpricing pagpatukod sa building, angay siya nga masuko ug maninguha nga masilotan ang mga responsable.

Kay nagtinguha man si Binay nga mahimong sunod nga president sa nasud gihashasan siya karon pag-ayo kun angayan ba nga pilion atol sa eleksyon sa 2016.

Pananglit padayon si Binay nga maglikay-likay ug dili direkta nga manubag sa pangutana kaniya kabahin niini nga isyu, mosamot nga dili na ganahan pa ang mga tawo kaniya.