Raket sa PNP
Nakabuylo si Direktor Heneral Alan Purisima pagsumbalik sa mga pundok nga nag-piyesta sa pagpasangil ug pagpasaka og mga kasong pagpangawkaw batok niya atol sa iyang pag-atubang sa Senado. Matod ni Purisima ang kampanya sa pagpalagpot niya sa katungdanan binuhatan sa gamhanang sindikato nga nasuko tungod sa pagkabungkag sa ilang raket sa Kampo Crame pagpamaligya ug pagpayuhot og peke nga mga lisensiya sa armas.
Nitataw si Purisima nga di siya motahan sa nasugdang kawsa paglimpiyo sa kapolisan bisan kinsa pay masakitan. Nipasalig siya nga atubangon ang tanang pasangil ug nipadayag og pagsalig nga ma-absuwelto siya sa Ombudsman, Commission on Audit, ug ubang buhatan nga nangimbestigar niya.
***
Ang panagang ni Purisima mao tingali nakapakumbinser nilang Presidente Noynoy Aquino ug Interior Secretary Mar Roxas nga di siya angayng mobakasyon, ni mobiya sa katungdanan. Kay nikalit man lang tuod pag-ulbo ang kontrobersiya ni Purisima dihang iyang giusab ang sistema sa pag-lisensiya sa mga armas.
Mas katuohan ang depensa ni Purisima kon maghingan siya og mga ngan. Kinsa may mga utok ug mga gaway sa iyang gitumbok nga minilyon ka pesos nga palusot sa pekeng mga lisensiya sa mga armas? Ordinaryo ba lang silang mga polis o may naapil nga mga heneral? Pulos polis ba lang ang nahilambigit o may kakonsabo sab silang mga sibilyan?
***
Apan ang mga nabisto sa imbestigasyon sa Senate Committee on Public Order nga giduma ni Senador Grace Poe nakapahimutang sa pagduda sa kaligdong sa liderato ni Purisima:
•Nangangkon si Purisima nga wa siya mangayo ug wa kahibawo pilay gasto ug unsay plano sa iyang mga higala nga nagtukod sa "White House" sa Crame;
•Bisan ang tigpamaba sa PNP nagduda nga ang proyekto gasa gikan sa Masons in the Jurisdiction of the Philippines nga si Purisima ang Grand Master; ug
•Nabisto nga ang hepe sa Internal Affairs Service sa PNP wa kahibawo nga may gahom diay siya pag-imbestigar sa mga pasangil batok ni Purisima.
***
Angayng atangan ang sangpotanan sa gimando ni Roxas nga pakisusi wa bay panagsungi sa interes ug wa ba bugtii og mas dagkong pabor ang mosunod nga maoy giila nga nagpatukod sa P11 milyones nga "White House":Carlos Gonzales sa ULTICON Builders; Atty. Alexander Lopez sa Pacific Concrete Corporation (nga gilambigit sab sa mga anomaliya sa mga Binay sa Makati); ug Christopher Pastrana sa CAPP Industries.
Morang na-apapangig si Purisima sa pangutana ni Senador Serge Osmeña nganong wa dasiga ang iyang mga higala nga unahon pagtabang ang mga tambalanan sa PNP nga wa gahini og bisan usa ka dako sa tinuig nilang budget. Na-blangko sab dihang gipaninglan ni Poe nganong way pinirmahan nga deed of donation ug ubang dokumento pagmatuod nga lehitimo ang transaksiyon.
- Latest
