Pagtidlom ug pagsulbong
Gibugoan ra gyod diay si Bise Presidente Jejomar Binay sa iyang mga dumadapig. Gipakaingon niya magyangu-yango lang gihapon sila bisan iyang gilikay-likayan ang mga pasangil sa pangurakot batok niya ug sa iyang pamilya. Sayop diay ang iyang pagtuo nga mosugot lang sila nga binuangan niya pagtubag ang mga ebidensiya ug mga testimoniya nga gikilkilan niya ug sa iyang asawa, anak ug mga hinanib ang adunahan uyamot nga panudlanan sa Dakbayan sa Makati.
Hinaot nga nakaamgo na si Binay nga iyang obligasyon ang pagpatin-aw sa mga transaksiyon nga iyang gisudlan dihang mayor pa sa Makati. Nga di diay igo ang panagang nga di angayng tuohan ang mga pasangil gikan sa iyang politikanhong mga kaatbang.
***
Dako ang pagtibugsok sa popularity rating ni Binay sa labing uwahing nasudnong survey sa Pulse Asia, gikan sa 41 porsiyento niadtong Hunyo ngadto sa 31% na lang karong buwana. Apan makaginhawa siya og luag kay, atubangan sa ahat nga mga deklarasyon nga nahugno nang iyang kandidatura, nagpabilin nga maoy labing pinalabi sa tanang namostura ug gituohan nga managan pagka presidente.
Timaan ni di lang sa kalig-on sa liderato ni Binay ug sa kalapad sa iyang politikanhong makinarya sa tibuok nasud kon dili sa kahuyang sab sa iyang mga kaatbang. Sakto si Binay sa iyang pangagpas nga di dayon motuo ang katawhan sa mga pasangil batok niya. Apan pipila nila nagduda na.
***
Ang pagsulbong sa rating ni Interior Secretary Mar Roxas ngadto sa 13 porsiyento karong buwana kon itandi sa 7 porsiyento lang niadtong Hunyo, maoy maayo ug daotang balita alang sa iyang damgo pagpuli ni Presidente Noynoy Aquino sa Malakanyang. Ang maayong balita mao nga siya nay nagsunod ni Binay. Apan ang daotang balita mao nga di tanang nibiya ni Binay nibalhin ni Roxas.
Layo pa gihapon si Roxas ni Binay. Gamay rang labaw ni Roxas sa mga nagsunod niya nga silang Senador Miriam Defensor Santiago (11 porsiyento) ug ang nagtablang Senador Grace Poe ug kanhi presidente Joseph Estrada (10 porsiyento).
***
Apan mas dako ang biya ni Binay kang Roxas sa pagsugod sa kampanya sa ilang panagbangga pagka-presidente niadtong 2010. Gani, si Senador Loren Legarda ang giisip ni Roxas niadtong higayona nga labing higpit niyang karibal. Ang kamapailubon ni Binay ug ang pangiyugpos ni Roxas maoy nakausab sa kamada.
Sayop si Roxas kon hingpit nga magsalig sa padayong pagtidlom sa popularidad ni Binay tungod sa nagpadayong imbestigasyon sa Senado. Kon way makapakumbinser nga mga ebidensiya batok ni Binay mapawong ang interes sa mga botante. Ug kon way mapakita nga talagsaong labok si Roxas isip labing sinaligan ug labing gipaboran ni Presidente Aquino, siya ra gihapoy mabasol kon mobalik pagsulbong si Binay. O maapsan na sab sa laing piliunon.
- Latest
