Klase, trabaho, ug baha
Mahimo ba nga ang sunod nga mga pahibawo sa pagsuspenso sa klase luwatan sa di pa makabiya ang mga tinun-an sa ilang mga pinuy-anan? Mas maayo kon himuon usa ka adlaw sa di pa ang gitakdang pag-abot sa katalagman. O kon way public storm warning signals apan kusog ang bundak sa uwan ug lapad ang baha, hinaot nga mapahibawo nang pagsuspenso sa klase sa di pa ang alas-6 sa buntag.
Kon pasado alas-6 sa buntag na luwatan ang pahibawo, mahinayak nang mga tinun-an ug ang ilang mga ginikanan pagsungasong sa uwan ug baha aron lang mabawo inig abot sa mga eskuylahan nga di gani mopasud nila sa ganghaan kay suspendido diayng klase.
***
Mahimo lang ni kon magtukaw ang hingtungdang mga buhatan sa gobyerno--ang Philippine Atmospheric, Geophysical and Astronomical Services Administration, Department of Education ug local government units. Aron andam silang motubag ug di maghagok sa pagpakisayod sa katawhan.
Hinaot nga matakdan nang Pagasa Visayas Director Oscar Tabada ang iyang mga kawani nga kamao nang mohubad inay magsumay-sumay lang og basa sa weather bulletins. Hinaot nga magsabot inay magtudlanay ang kadagkoan sa DepEd ug LGUs sa pagpahibawo sa labing sayo nga kahigayonan sa mga tinun-an ug mga tagduma sa mga eskuylahan sa pagsuspenso sa klase.
***
Di magmata og buntag ang mga mayor sa kalungsoran ug mga dakbayan ug mga gobernador sa mga lalawigan kon magtukaw ang ilang mga tagduma sa disaster ug risk reduction offices 24 oras matag adlaw ug pito ka adlaw matag semana. Kon tagdugay momata ang mga mayor ug mga gobernador mahimong tahasan ang ilang public information officers sa pagsubay sa mga panghitabo ug paghimo sa tukmang mga pahibawo sa sayong buntag.
Mapuslanon alang sa mga molupyo ang mas sayo nga pahibawo sa pagsuspenso sa klase o pagpasabot sa kahimtang sa panahon. Aron nga magiyahan sa tibuok adlaw nilang kalihokan ug makalikay sa labing pait nga epekto sa katalagman.
***
Kay maikugon mang lokal nga mga opisyal pag-apil og suspenso sa mga klase sa pribadong mga eskuylahan, hinaot nga ang mga tagduma magpahimutang sab og samang sistema aron nga mas sayo nga mapahibawo ang ilang mga tinun-an sa pagsuspenso sa klase.
Hinaot nga hunungon na sa mga tagduma sa eskuylahan ang pag-isip sa mga tinun-an sa kolehiyo nga mga isda. Mangabasa ug mangaanod sab sila sa baha busa angay sang suspensuhon ang ilang klase. Hinaot nga magsugod na sang mga tagduma sa gobyerno ug pribadong mga kompaniya pagsuspenso sa trabaho kon ngil-ad ang panahon. Bisan sud lang sa pila ka oras aron di hingpit mapiang ang operasyon. Mahimong mopahibawo ra sa pagbalik sa trabaho kon mokalma nang uwan ug mohubas nang baha.
- Latest
