Panagang ni Madrigal
Di katabang sa naapiking kawsa sa suspendidong Capitol security head, Loy Anthony Madrigal, ug sa iyang sekretarya bisan kon tinuod pa ang kasayuran nga among nadawat nga nagpabunyag silang duha sa pagka Muslim:
•Samtang makahimo ang lalaking Muslim sa pakigminyo og hangtod upat ka asawa, di siya makahimo pagpakasal sa babaye nga minyo nang daan;
•Gidid-an ang babaye nga Muslim nga duna nay bana sa pag-angkon og laing bana; ug
•Samtang gitahud sa gobyerno sa Pilipinas ang mga balaod sa Islam sa kaminyuon, di makapasalipod silang Madrigal ug ang iyang sekretarya sa bag-o nilang relihiyon gikan sa mga lagda sa Civil Service Commission.
***
Kusganong gipanalipdan sa mga magtutudlo sa Islam ang managlahi nga lagda sa pagminyo sa kalalakin-an ug kababayen-an. Matod nila di makapatuyang ang kalalakin-an sa pagpangasawa og daghan. Kay gipahamtangan sila og kundisyon--ang katakos sa pagbuhi og hangtod upat ka pamilya. Tungod sa kalisod sa panahon, nipasabot sila nga kasagaran sa mga lalaking Muslim tagsa ray asawa.
Gitataw sab nila nga kon magminyo og kadaghan ang babayeng Muslim lisod ang pagtino kinsay amahan sa iyang mga anak ug busa magkaguliyang ang pagpanunod sa kabtangan. Nipasidaan sab sila nga mahimong mosilaob ang kagubot tungod sa pagsinahay sa kalalakin-an nga magsawo sa usa ka babaye.
***
Gawas nga di makaminyo og laing lalaki bisan ubos sa mga lagda sa Islam, ang sekretarya ni Madrigal gipasanginlan pa gyod sa iyang bana nga maoy nitalikod sa ilang kaminyuon. Mosamot ang kamabulukon ning eskandalo kon mouyon ang sekretarya sa sugyot ni Madrigal nga motingog sab sa mga pasangil batok nila.
Di ko bilib sa bana nga nakaako sa pagpakauwaw di lang sa iyang asawa kon dili hasta na ug labi na gyod sa gagmay nilang mga anak. Makaangkon unta og dugang simpatiya sa publiko kon wa pa moapil sa luod nga binayloay sa publiko. Gawas kon tinuod nga kahadlok ni Madrigal maoy nakapugong pagkuha pagbalik sa iyang pamilya.
***
Hinaot nga mohunong na si Madrigal pagpilit sa iyang buhatan. Hinaot nga hunungon na paggamit ang kabos nga mga mangingisda pagpabilin niya sa katungdanan. Mahimong epektibo siya sa kampanya batok sa ilegal nga pangisda apan di mainutil ang Kapitolyo kon mawa siya.
Gitug-anan bang Madrigal si Davide nga ang sakyanan sa Kapitolyo nga nadestino niya nakabangga og nagmotorsiklong magtiayon nga ilang gikasugat sa Dakbayan sa Bogo dihang nagsulti sila sa Kapitolyo niadtong Lunes sa buntag pila ka oras human sa aksidente? Nganong gipaabot man niya nga ang mga tagtungod sa mga biktima ang nipahibawo sa publiko nga namatay ang usa sa mga biktima? Ang bisan unsang panagang ni Madrigal sa mga pasangil batok niya mohungaw tungod sa nagkabantang nga kakuwang sa kamatinud-anon.
- Latest
