Sentensiya sa tanang pork
Di mabasol ang mga pundok nga nibatok sa pork barrel sa pagpadayon sa ilang kampanya bisan gibasura na sa Korte Suprema nga ilegal ug unconstitutional ang Priority Development Assistance Fund ug Disbursement Acceleration Program ug bisan gipapas na sa Malakanyang ang tinuig nga pork barrel nga P200 milyones sa matag senador ug P70 milyones matag kongresista sugod karong tuiga.
Kay di boluntaryo ang pagpapas sa Malakanyang ug sa Kongreso sa pork barrel. Napugos ra sila tungod sa lapad nga protesta sa masuk-anong mga magbubuhis ug sa maisugong paghukom dayon sa Korte Suprema. May sukaranan ang kahadlok nga kon mangiyugpos na ang katawhan mahimong ipayuhot pagbalik ang pork.
***
Maong di angayng saputon si Presidente Noynoy Aquino kon ang gikuwestiyon karon mao na sab ang mas dakong pundo nga gitugyan sa iyang buhatan nga siya ra gihapon ang magbuot unsaon paggasto. Maong di sab angayng maalarma ang Korte Suprema nga gisumbalik silang Presidente Aquino ug sa iyang mga alyado labot sa ilang Judiciary Development Fund.
Kay samtang wa pay ebidensiya nga nangawat si Presidente Aquino ug gipamatud-an sa Commission on Audit nga wa mosimang sa pribadong bolsa ang JDF, di na mapapas ang kabalaka sa mga magbubuhis nga ang dagkong pundo nga wa pa maggahin og tukmang mga proyekto nagsilbing dakong tentasyon sa mga hingtungdan.
***
Wa katabang sa kawsa sa Malakanyang ug sa Kongreso ang pagkabisto nga may nalista sa gisugyot nga nasudnong budget alang sa 2015 nga "various projects" ug "projects to be determined." Maong di magnihit ang mga pirma nga matigom sa mga tigpasiugda sa People's Initiative batok sa pork barrel.
Lisod ug kutas hinuon ang pagtigom og pirma sa 10% sa tanang rehistradong botante (5.2 milyones sa 52 milyones ka rehistradong botante sa kataposang piniliay sa Mayo sa niaging tuig) nga kinahanglang maglakip og labing menos 3% sa mga botante sa matag distrito. Apan mao ra ni paagi pag-umol sa balaod nga di moagi sa Kongreso ug di kinahanglang pirmahan sa presidente.
***
Inay apikihon angayng tahuron ang nasudnong kampanya pagtigom og mga pirma. Angayng hatagan ang katawhan sa kahigayonan pagtino nga di na masubli ang pork barrel scandal ug ubang kahiwian ug nga maggasto na gyong buhis alang sa labing mahinungdanon ug dinaliang panginahanglan.
Makiangayon alang sa tanang hingtungdan nga itahan sa mga senador ug mga kongresista ang naandan nilang bisyo pagpasiugda og mga proyekto ug sa Malakanyang ang pag-usab-usab sa mga proyekto sa naaprobahan nang General Appropriations Act. Sayop sang Korte Suprema kon nagtuong makatago sa ilang fiscal autonomy. Human nabasura ang PDAF ug DAP, kon di mapapas mausab gyong JDF aron pagtino nga maadto sa mga kawani ug mga hukmanan.
- Latest
