Kahimangod ni Noynoy

Gipalili ming Cabinet Secretary Rene Almendras nganong lahi ang ikalimang State of the Nation Address  ni Presidente Noynoy Aquino kay sa nangagi. Matod niya pila ka oras sa wa pang SONA nagsige pa og usab si Aquino sa usa sa labing taas niyang diskurso.

Niangkon si Almendras nga siya ang tighatag sa kopya sa SONA ngadto sa Kongreso. Sa nangaging katuigan, nahatod niyang SONA sa wa pay ala-una sa hapon. Apan niadtong Lunes, alas-2:10 na sa hapon niya nahatag ang SONA. Nanuyo na niya ang mga kawani sa Radio-TV Malacañang kay kinahanglan pa nilang hingpiton ang plano alang sa mga kamera ug visual aids.

***

Gibutyag ni Almendras atol sa media forum sa Kapisanan ng mga Brodkaster ng Pilipinas Cebu Chapter nga ang emosyonal nga bahin sa SONA wa maapil sa orihinal nga draft. Nangagpas si Almendras nga wa kapugong sa iyang emosyon si Aquino dihang naghisgot na sa iyang mga ginikanan. Labi na dihang nanumpa si Aquino nga di niya usikan ni bulingbulingan ang maayong mga kabilin sa iyang amahan ug inahan.

Matod ni Almendras may sukaranan si Aquino nga mahimangod. Kay human sa dakong sakripisyo sa tibuok nilang pamilya ug bisan wa siya mahilambigit sa bisan unsang pangawat, makalilisang ang mga panghimaraot nga iyang nahiagoman nga mora siyang nakahimo sa labing bangis nga krimen sa bag-ong panahon.

***

Ang media forum nga gitambongan sa gatosan ka tinun-an sa University of San Jose-Recoletos gisugdan ni Almendras pinaagi sa pagpahinumdom nga "transformation" sa gobyerno ang labing dakong tuyo ni Presidente Aquino sa iyang pagsanong sa sibaw nga awhag sa katawhan pagdagan pagka presidente human sa kamatayon sa iyang inahan nga si kanhi presidente Cory Aquino.

Matod ni Almendras ang talagsaong kahigayonan pag-usab sa gobyerno maoy nakausab sa plano ni Aquino pag-retiro sa politika human sa iyang termino sa Senado. Nagkauban sila sa sakyanan atol sa prosesyon sa haya ni Cory kanus-a nangindahay si Aquino nga hingpit nang makapahuway ang ilang pamilya pag-alagad sa nasud.

***

Gitataw ni Almendras nga di tinuod nga nanamilit na si Aquino sa iyang SONA. Hinunoa, gitataw ni Aquino ang iyang determinasyon sa pagpadayon sa kausaban nga iya nang nasugdan bisan pa sa daghang gamhanang puwersa nga nibabag nila.

Kumbinsido si Almendras nga may organisadong kampanya paglubog sa kontrobersiya sa Disbursement Acceleration Program, nga ipamugos gyod pagsumpay sa Priority Development Assistance Fund, aron nga mahimong sad-an ang tanan sa mata sa katawhan. Matod niya hapit tanang kahugpongan sa media nibalibad sa tanyag sa ubang mga sakop sa gabinete pagsulti sa ilang pagpatuman sa proyekto sa DAP kay niinsistir sila nga si Budget Secretary Butch Abad ray angayng patingugon.

[email protected].