Si Noynoy ug ang kabaw
Wa gyoy dag-anan si Presidente Noynoy Aquino. Bisan unsay iyang buhaton tungluhon siya sa iyang mga kaatbang nga way lami. Tingali tinuod gyong pasidaan sa atong katiguwangan nga di gyod kang katagbaw sa tanan. Labi na kay nangahas siya og usab sa gobyerno. Human siya nideklarar og gubat batok sa pangurakot gipaabot nang daan nga kutikutihon ug pangitaan og sayop ang iyang matag lakang sa labing menos duha ka pundok:
Sa mga tawo nga nagtinguha nga mapakyas siya kay nahulga nga mahunong ang ilang paglungkab sa panudlanan sa katawhan; ug
Sa mga tawo nga nahadlok nga molampos siya kay di na silang kapuli sa gahom.
* * *
Way angayng kabalak-an si Aquino sa mga magbubuhis nga tinuorayng nagpakabana alang sa makiangayong kausaban. Nagpaluyo sila sa mga lakang sa iyang pamunoan nga giisip nilang makaayo sa nasud. Apan kusganon sab silang nanaway sa bisan unsang mga timaan nga mahimong makapasaag niya og agianan.
Suwayan sila og lawgaw sa duha ka pundok nga nahisgutan sa ibabaw. Bisan may mga higayon nga nasudlan, apan sa kinatibuk-an napanalipdan sa nagpakabana nga mga magbubuhis ang ilang kaligdong pinaagi sa pag-insistir nga ang mga protesta batok sa kahiwian di sa mga personalidad. Hinaot nga may makahunghong ni Aquino nga angay siyang maminaw inay mobatok sa ligdong nga mga protesta.
* * *
Dihang nisugyot si Aquino nga hatagan si Senador Juan Ponce Enrile og espesyal nga pagtagad tungod sa iyang pangedaron gipasanginlan siyang nanghilabot sa Sandiganbayan. Dihang gitumang sugo sa Sandiganbayan nga ibalhog sa Bicutan si Atty. Gigi Reyes, kanhi chief of staff ni Enrile, gisaway na sang way kaluoy ug gitumbok nang daan nga dugo sa iyang mga kamot kon may mahitabo sa masakitong sinumbong.
Pagsugod sa imbestigasyon sa pork barrel scandal, gipasanginlan siyang nanggukod sa iyang politikanhong mga kaatbang. Dihang naapil sa mga kaso ang labing suod niyang mga alyado gitunglo na sab siyang maoy tinuod nga pork barrel king.
* * *
Dihang nanaway si Aquino sa pagbasura sa Korte Suprema sa Disbursement Acceleration Program ginganlan siyang diktador. Apan dihang nituki sa mga probisyon sa Administrative Code of 1987 nga nagtugot sa DAP ug sa pagbalhin-balhin sa pundo sa Korte Suprema gikan ug ngadto sa mga hukmanan ug Department of Justice, gimahay na sab nganong wa mopagawas sa kasayuran sa wa pa mabasurang DAP.
Gigarantiyahan sa demokrasya ang pagpanaway. Apil nang pagpasaka og impeachment complaint batok sa presidente pinasikad lang sa privilege speech sa senador nga napriso na sa plunder. Hinaot nga ning ikaupat nga tuig sa iyang pamunoan nahibawo na si Aquino unsay paminawon ug isalikway. Aron di mahisama sa amahan ug anak nga nipas-an sa kabaw nga ilang gisakyan kay nagpatuo sa nagkatuiris nga mga komentaryo sa mga tawong ilang nalabyan.
- Latest
