Kalainan sa DAP ug PDAF
Dagkong kalainan sa susama apan buwag nga mga kontrobersiya sa Priority Development Assistance Fund ug sa Disbursement Acceleration Program, nga pulos gideklarar sa Korte Suprema nga ilegal ug unconstitutional:
• Gilalisan kinsay mga nakabolsa sa P10 bilyones nga pork barrel scandal nga way bisan usa ka dako nga naabot sa mga proyekto ni nadawat sa katawhan;
• Sa kaso sa DAP, gilalisan kon ang mga proyekto, nga naapil sa taas uyamot nga listahan nga gipagawas ni Budget Secretary Butch Abad dungan sa iyang pag- atubang sa Senado sa niaging semana, tinuod bang pulos dinalian ug alang sa pagpalambo sa ekonomiya ug pagtabang sa labing kabos sa katawhan.
***
Hapit na mahuman ang imbestigasyon sa mga transaksiyon sa PDAF. Wa pa hinuon mapasaka sa Sandiganbayan ang ikaduha ug ikatulong hut-ong sa mga kasong plunder nga naglambigit na sa labing suod nga mga alyado ni Presidente Noynoy Aquino nga silang kanhi customs commissioner Ruffy Biazon ug Tesda Director General Joel Villanueva.
Mao pay pagsugod sa imbestigasyon nadapat ba gyod sa mga proyekto ang mas dakong pundo sa DAP. Bugtong namasangil og kahiwian mao si Benhur Luy, whistleblower sa pork barrel scandal, kinsa nibutyag nga ang DAP sa mga senador nga silang Juan Ponce Enrile, Jinggoy Estrada ug Bong Revilla pulos nasuyop sa pekeng NGOs ni Janet Lim Napoles.
***
Wa pa sab hinuoy abundang ebidensiya nga natarung pagpatuman ang mga proyekto sa DAP. Gawas sa mga pangangkon sa nagkalainlaing buhatan sa gobyerno nga napahimuslan na sa mga magbubuhis ang ilang mga proyekto nga gigastohan sa DAP, wa pay napagawas nga klarong mga dokumento nga mohingan ug mohatag og dugang detalye sa tanang proyekto sa DAP.
Kon unsa kasibaw ang mga pangangkon sa mga proyekto sa DAP, mao sab kamingaw ang beneficiaries sa mga proyekto sa PDAF nilang Enrile, Estrada, Revilla ug ubang mga sinumbong. Nihunong na gani sila og pangangkon sa bisan unsang proyekto. Igo na lang nisentro sa ilang depensa nga way ebidensiya nga nakabahin sila sa dakong kawat.
***
Pulos giduphan ni Presidente Aquino ang PDAF ug DAP. Nilugak na lang siya pagpanalipod sa PDAF dihang niulbo nang kasuko sa katawhan pinaagi sa lapad nga mga protesta sa Sugbo, Metro Manila ug ubang bahin sa nasud, dayong basura ini sa labawng hukmanan.
Padayong panalipod ni Aquino sa DAP, bisan imposibleng mabali ang 13-0 nga desisyon. Nga di pa hinuon final ug executory. Ug pinaagi sa motion for reconsideration sa Malakanyang, mahimong mausab ang pipila ka bahin. Apil nang pagkuwestiyon sa good faith sa mga tigpatuman sa DAP ug pagpasabot sa na-dokumentohang pagpabalhin sa P100 milyones nga pundo pagtukod sa Manila Hall of Justice gikan ug ngadto sa Korte Suprema ug Department of Justice.
- Latest
