Kanus-a dutli sa kaikog?

Si Cebu City Councilor Alvin Dizon maoy unang nakauli sa P20,000 nga calamity assistance gikan sa City Hall niadtong Disyembre. Bisan nagusbat sa bagyong Yolanda ang bay sa iyang mga ginikanan sa Ormoc City, niangkon si Dizon nga siya mismo wa mabiktima sa katalagman. Bisan nagasto niyang hinabang pagpabakwet sa iyang kaparyentihan nga way suplay sa tubig ug kuryente sud sa pila ka semana, giuli ni Dizon ang kuwarta kay dunay lehitimong mga pagduda sa legalidad sa hinabang.

Nipaapas si Dizon nga wa niya talikdi ang iyang kaubanan sa City Council nga niaprobar sa gahin. Igo lang niyang gitahud ang sibaw nga sentimento sa mga Sugbuanon batok sa gikuwestiyon nga hinabang.

***

Nisunod ni Dizon ang kawani sa iyang buhatan. Kinsa niangkon nga gilainan siyang nidawat sa hinabang kay di man siya tinuod nga biktima sa katalagman. Di sab siya gustong mamantsahan ang usa pa lang ka tuig niyang pag-alagad sa gobiyerno atubangan sa pagkuwestiyon sa Commission on Audit ug sa imbestigasyon sa Malakanyang sa legalidad sa hinabang.

Duha ka konsehal nga kauban ni Dizon nipahibawo nang Cebu City Treasurer Diwa Cuevas nga mouli sab sa hinabang: Silang Nestor Archival ug Bob Cabarrubias. Nangomedya si Cabarrubias ni Konsehal Dave Tumulak nga iyang iprenda iyang relo aron makauli sa P20,000. Si Tumulak unya na mouli kon soguon nang Presidente Noynoy Aquino.

***

Nikumpisal si Dizon atol sa Arangkada sa DYAB Abante Pa, Bisaya! nga wa nila matarung pagtuki ang P61.1 milyones nga supplemental budget alang sa calamity assistance. Kay apiki nang napresentar sa kataposang sesyon sa City Council dayong bakasyon sa Pasko ug Bag-ong Tuig.

Bisan si Tumulak nitataw nga wa siyang kaapil sa pagtuki sa gahin. Nauwahi siya pagsud sa session hall. Paglingkod niya mao gyoy paghapak sa gavel sa ilang presiding officer, Bise Mayor Edgar Labella, nga aprobado nang ordinansahon nga gipangamahanan ni Konsehal Bebs Andales.

***

Kun hangtod karon wa pa makumbinser silang Mayor Mike Rama ug ubang mga opisyal ug kawani sa City Hall sa kadako sa eskandalo sa paghatag sa ilang kaugalingon og hinabang alang sa katalagman nga wa nila mahiagomi, niay duha ka sugilanon sa tinuod nga mga biktima:

•Si Maricel, bag-ong kawani sa nasudnong ahensiya sa gobiyerno nga nagbase sa Mandaue, nawad-an sa iyang pinuy-anan paghapak ni Yolanda sa Tabogon, apan wa kakuha og calamity loan sa Government Service Insurance System  kay wa pa kaabot og usa ka tuig sa serbisyo; ug

•Mga kawani sa Tubigon, Bohol nga naigo sa makalilisang nga linog niadtong Oktubre nakadawat og P5,000 nga hinabang gikan sa munisipyo apan ang katunga giisip nga loan nga ilang gidatadatahan og P250 matag ting-suweldo.

***

Email: [email protected]