Iuli ang dan sa katawhan

Kasagaran sa mga nisupak sa pagtukod og bicycle lanes sa Dakbayan sa Sugbo nagtuo nga way igong luna sa kadalanan kay napuno na sa dagkong mga sakyanan. Biktima sila sa sayop nga pagtuo nga ang kadalanan gipanag-iya sa mga motorista ug sa ilang mga sakyanan. Nga di angayng hasulon sa mga bisikleta, motorsiklo ug bisan sa katawhan nga manglakaw sa dan.

Hinaot nga sa di pa sila mahinayak pagtamay sa mga siklesta, may makapahinumdom sa mga nisupak nga ang kadalanan alang sa tanang matang sa mga sakyanan. Nga makahimong mas sayon sa pagbiyahe sa katawhan gikan sa usa ka dapit ngadto sa lain. Apil nang pagbisikleta. Ug pagbaktas.

***

Labing makauuwaw nga ebidensiya sa kaubos sa pagtan-aw sa nangangkon nga mga eksperto sa trapiko mao ang ilang gihingan sa mga tawo nga molabang ug mogamit sa kadalanan--pedestrians. Nga segun sa nagkahulogan ug: lacking inspiration or excitement; dull, boring, tedious, monotonous, uneventful, unremarkable, tiresome, wearisome, uninspired, unimaginative, unexciting, uninteresting, uninvolving.

Napakyas sila pagsagop sa mas dakong kamatuoran nga ang katawhan maoy tinuod nga hawod sa kadalanan. Nga ang ilang kaluwas ug kasayon maoy ipatigbabaw sa tanang higayon. Maong may mga lagda batok sa mga motorista nga magpaturagas ug mga sakyanan nga mobuga og makahilong aso. Maong angay lang nga ipatuman ang mga lagda pagpalambo sa kahimsog sa katawhan, sama sa pagbisikleta.

***

Abunda ang mga pagtuon sa dakong kaayuhan sa pagtukod og bicycle lanes sa New York ug ubang dagkong dakbayan sa kalibotan: Niusbaw ang mga nagbisikleta paingon sa ilang trabahoan ug eskuylahan, nimenos ang nanagan nga de makina nga mga sakyanan ug nitidlom pag-ayo ang mga aksidente.

Bugtong gikinahanglan mao ang pagpahinumdom sa katawhan sa mas himsog ug mas luwas nga mga alternatibo sa pagbiyahe, nga bisan unsaon pagpalapad sa kadalanan di paigo sa mas paspas nga pagtubo sa gidaghanon sa baratuhon ug mas hugaw nga mga sakyanan ug nga mas hugot nang ipatuman ang mga lagda batok sa iresponsable nga paggamit sa kadalanan, ma-SUV, ma-motorsiklo, o ma-bisikleta man.

***

Labing lig-on nga argumento nga gikapyotan sa mga nisupak sa bicycle lanes mao ang kahagip-ot sa kadalanan sa Dakbayan sa Sugbo. Bisan sa New York ug ubang mga dakbayan, di tanang kadalanan ang himoan og bicycle lanes. May mga dan gyod nga mas apiki kay sa uban ug busa di luwas alang sa mga siklesta.

Apan di ni igong rason nga di palapdan ang atong kadalanan. Mohunong na ba lang ta paglambo kay puno nang kadalanan? Gani, may malambuong mga dakbayan nipagamay sa pipila nila ka kadalanan aron mas mag-ilhanay ug magkasuod ang ilang mga molupyo ug katilingban. Panahon nang iuli ang kadalanan ngadto sa tinuod nga mga tag-iya--ang katawhan.

***

Email: [email protected]