Hangtod sa sunod trahedya

Samtang nagpadayon ang imbestigasyon sa pagkalunod sa barko sa South Korea nga gikahadlokang nipatay sa gatosan ka pasahero, gitanggong sa gobyerno ang kapitan ug unom ka tripulante. Nga gipasanginlang nagpabaya ug naglangay-langay sa pagpabakwet dayon sa mga pasahero dihang nitakilid na ang barko.

Lahi kaayo kon itandi dinhi sa ato. Bisan mas seryuso ang kalapasan nga nahimo ug bisan mas daghang kinabuhi ang nakalas, way bisan usa ka kapitan ni tripulante nga natanggong. Sama nga bisan sa kadaghan na sa mga trahedya sa kadagatan way bisan usa ka kompaniya sa barko nga nalaksian og lisensiya.

* * *

Giposasan niadto pang Sabado, tulo ka adlaw human sa pagkalunod sa barkong Sewol nga gisakyan sa mga tinun-an nga namakasyon, ang kapitan nga si Lee Joon-Seok. Kinsa gitumbok nga naneguro ra pag-ikyas pinasagdan ang 476 ka pasahero nga natanggong sud sa barko. Gidungan pagdakop niya ang timunil ug ang wa pay kasinatian nga ikatulong opisyal nga maoy iyang gitugyanan pagduma sa barko dihang naapiki.

Gisunod pagdakop gahapon ang tulo ka opisyal ug usa ka inhinyero. Matod sa prosecutors ang bag-ong upat ka dinakpan mag-atubang og samang mga kaso nga ilang gipasaka batok sa kapitan. Niawhag ang prosecutors nga lugwayan ang pagtanggong sa kapitan ug mga tripulante human mas gipalapdan pa nila ang imbestigasyon sa katalagman.

* * *

Ka-suwerte sa kapitan ug mga tripulante sa MV Sulpicio Express Siete nga maoy gipasanginlang nakabangga ug nakapalunod sa MV St. Thomas Aquinas nga ilang gikabangga sa kadagatan sa Lauis Ledge niadtong Agosto sa niaging tuig. Way bisan usa nila nga gitanggong. Way bisan usa nga napasakaan og kaso.

Kataposan natong nahibaw-an atol sa imbestigasyon sa Senado niadtong Oktubre, duha ka buwan human sa panagbangga, nga si Kapitan Rolito Gilo wa pa gani suspensoha sa kompaniya. Nipasabot ang kadagkoan sa Philippine Span Asia Carrier Corporation, bag-ong ngan sa Sulpicio Lines Inc., nga unya na nila suspensuhon si Gilo kon maayo na ang naggusbat niyang barko.

* * *

Hagbay rang natapos ang pakisusi ug naluwatan ang mga rekomendasyon sa Special Board of Marine Inquiry  labot sa panagbangga sa MV Sulpicio Express Siete ug MV St. Thomas Aquinas. Apan hangtod karon, walo ka buwan human sa trahedya, wa pay bisan unsang silot batok ni bisan kinsa nga napahamtang ang Department of Transportation and Communications.

Tungod sa makalilisang nga linog niadtong Oktubre ug sa bagyong Yolanda niadtong Nobyembre nga nagbilin og lapad nga kadaot sa Kabisay-an, nalipat ang katawhan sa pagyaka sa imbestigasyon sa panagbangga. Hangtod nga nalunod ang barko sa South Korea niadtong Miyerkules Santo. Ug sa makausa pa napugwat ta sa pait nga kamatuoran sa kainutil sa gobyerno pagsilot sa mga responsable ug pagpugong sa umaabot pang katalagman.

* * *

Email: [email protected]