Hapit nang panudya sa telcos

Sa pito ka bilyon ka molupyo sa tibuok kalibotan karon, gibanabana nga lima ka bilyon nga nahimutang sa labing kabos ug labing hilit nga kanasuran way internet access. Sila ang gustong abton sa duha ka labing ambisyuso nga higanteng mga kompaniya, ang Google ug Facebook. Nga naglumba aron maoy makauna pagsumpay sa bag-ong mga konsumidor ngadto sa world wide web.

Gipaabot nga mas mobarato pa gyod ang smart phones sa umaabot nga katuigan. Nga gusto sang kontrolahon sa Google ug Facebook. Mayoriya sa kapin sa bilyon ka sakop sa Facebook naggamit og smart phone. Samtang gipaabot sang molapas sa usa ka bilyon ang manggamit sa Android phones sa Google karong tuiga.

***

Labing dakong babag sa ilang ambisyon mao ang internet access. O ang kakuwang ini. Tungod sa padayong pagpanghawod sa higanteng mga kompaniya sa telepono, di makapatuyang sa ilang gibati ang Google ug Facebook nga di moagi sa mga kable ug cellsites sa telcos nga ang lunlon nga katuyoan mao rang pagpaburot sa ginansiya.

Hangtod karon pakyas ang daghang pagsuway sa Google paglaktaw sa telcos. Wa mosalir ang Google Voice ug limitado sa dagkong dakbayan ang naabot sa Google Fiber. Limitado sang kalamposan sa proyekto sa Facebook pagpahiyos sa iyang data ug pakiglambigit sa pipila ka telcos pagtanyag nga libre sa Facebook ngadto sa mga konsumidor.

***

Mao ni sukaranan ngano nga ang Google, nga ang orihinal nga negosyo mao ra ang search, ug ang Facebook, nga ang orihinal nga raket mao ra ang pagtukod sa labing lapad nga social media network, sa usa lang ka pamilok pulos na nanag-iya og gagmayng mga ayroplano sa kawanangan nga gipanghinaot nga makahatod og internet access ngadto sa mga dapit nga wa pa maabot sa telcos.

Kitang mga konsumidor angayng magmaya. Tungod sa pagtumaw sa bag-ong matang sa mga negosyante nga nangambisyon pagtumpi og dagkong ginansiya gikan sa tinuorayng pangalagad. Di sama sa telcos nga way kukauwaw ni pagpanagana nga nagpahimus ug namintaha.

***

Apan ang teknolohiya nga gigakos sa Google ug Facebook mahimong abtan pa og pila ka tuig una mapuslan. Masaaron hinuon ang katakos sa drones pagpabilin sa kawanangan ug pagsabwag og internet signal sud sa pila ka tuig ginamit ang kainit sa adlaw. Bisan ang Amazon, laing higanteng kompaniya nga karibal sa Google ug Facebook, nga mopalupad og drones aron paghatod sa iyang mga baligya ngadto sa kabalayan, niangkon nga abtan og upat ka tuig una mahinog ang teknolohiya.

May sukaranan gihapon ang telcos nga kuyawan. Kay kon kahabolan og paspas nga internet access ang labing hilit nga mga bahin sa kalibotan, imposibleng laktawan sa Google ug Facebook ang dagkong mga dakbayan nga mao roy gatasan sa telcos.

***

Email: [email protected]