Freeman Opinion ( Leaderboard Top ), pagematch: , sectionmatch: 1

Wa lang ta'y suk-anay!

Dinhi niining atong lindog kaniadtong Martes, gihagit nako si Mayor Michael Rama nga ipakita niya ang iyang “political will” sa paghimo sa angay’ng ipatuman.

Ingon gani sa nahimangod si Mayor Rama kanako kay nagtoo man siya nga ang maong lindog gitumong aron dauton siya, ilabi na nga nagsingabot na ang eleksyon. Apan sayop si Mayor Rama sa iyang gitoohan kay maayo ang tumong sa akong hagit kaniya.

Gihagit nako si Mayor Rama sa akong lindog sa miaging semana nga trabahoon nga makuha na ang mga poste nga gabarog taliwala sa Escario Street atubangan sa Golden Peak Hotel kay dugay ra nga gipalapdan ang karsada apan wala g’yud kuhaa ang poste.

Sa among press conference, giingnan ko sa mayor nga gimandoan niya ang CITOM nga mopatuman na sa dugay na niyang kamandoan.

Tuod, duha ka adlaw, naibot dayon ang poste apil kadtong semento nga nagsilbi nga “base” sa traffic light post. Karon, magamit na nga “two-way” ang Escario Street atubangan sa hotel. 

Unya, sayop ba gud ko sa akong pagsigeng-sigeng sa mayor nga lihukon na kadto? Apan angay pa gud nga hagiton nato ang mayor aron molihok?

Freeman ( Article MRec ), pagematch: 1, sectionmatch:

Natan-aw nako nga daghang kamandoan sa mayor nga wala mapatuman kay unsaon, ang pipila sa mga tawo nga iyang tahasan, malimot ra man ‘sab. Kon ang mga opisyal sa City Hall nga tugyanan sa mayor molihok lang g’yud, tingali mopaspas ang kahumanan sa mga proyekto.

Tiaw mo, Hulyo 1 pa ang deadline sa mayor pagpakuha sa maong mga poste ug nakuha kini kaniadto na lang miaging semana?

Ang karsada nga magdugtong gikan sa Singson Village, Guadalupe paingon sa Obedience Street sa Kalunasan, gihatagan usab og deadline sa mayor Agosto 21. Apan dihang gisusi nako, Agosto 20, dako pa kaayo ang trabahoon.

Hangtod karon, hapit na mo-usa ka buwan gikan sa gihatag nga deadline, wala pa gani makompleto ang maong proyekto. Basin nakalimot ang mga higala nato sa DEPW sa pagsuperbisar sa maong mga proyekto?

Nganong nagpakabana man ako niining maong mga proyekto? Ang rason mao nga naglambigit kini sa pagpahapsay sa dagan sa mga sakyanan.

Sama sa kampanya sa dakbayan nga gitawag og Operation Plan (Oplan) Hagibis nga hingpit na gayud nga nakalimtan sa pagpatuman. Kampanya kini nga hapsayon ang atong kadalanan gikan sa mga abusado nga drayber sa mga motor nga gitawag og “Habal-habal.”

Giisip nako nga mga amigo kining mga drayber sa Habal-habal, apan angay usab sila nga disiplinahon tungod kay miabuso na sila.

Wala nila gamita ang ilang utok nga makabalda sila sa pag-agi sa sakyanan sa karsada kay anha man sila moparada sa agianan sa sakyanan samtang maghuwat og pasahero.

Kon ako la’y pangutan-on, uyon ko nga dili pangdakpon kining mga nag-drive og “habal-habal” kay tingali wala sila’y laing paagi sa panginabuhi nga tinarung. Apan ang isyu kay wala sila magtarong sa ilang mga lihok.

Basin wala na makasuroy si Mayor Rama sa mga dapit nga daghang habal-habal. Ako ka nga pahibaw-on mayor Mike nga misiaw na usab karon ang mga habal-habal nga mobabag sa karsada inigtungas nimo paingon sa Marco Polo Hotel, unya diha ‘sab dapit sa tumoy nga bahin sa Salinas Drive sa JY Square.

Angay tingali nga dili isalig ni Mayor Rama ang pagdumala sa Oplan Hagibis ngadto sa iyang city administrator kay “busy” kaayo kini sa trabaho. Daghang sugo niya matag adlaw, adto ihapak sa iyang city administrator.

Mas labing maayo nga ang pangulo sa CITOM ug ang hepe sa Cebu City traffic group maoy iyang saligan sa Oplan Hagibis kay ila kining trabaho ang pagpahapsay sa karsada. 

Ang mga opisyal sa barangay, ayaw na lang paglaum nga motabang na sila pagsumpo sa abuso sa mga habal-habal draybers kay pamolitika ra’y anaa sa ilang utok.

Asa ba kana sila mohimo’g lakang nga makapasuko sa ilang mga botante. Aw kon imong pasultion, maayo kaayo mosulti apan palihuka dili ba walay nahimo. Alang nako, ang maayo nga mga opisyal mao kadtong dili magpanuko sa pagpatuman sa balaod.

Kadtong mga tawo nga dili mahadlok nga sila mapilde sa sunod nila nga pagdagan sa sama nga katungdanan, basta kay mapatuman nila kon unsay kaayohan sa kadaghanan.

Unsaon, nga gusto man g’yud nga mogunit og katungdanan. Ang pangutana, ngano kaha? Kamo na lay tubag.

Freeman ( Article MRec ), pagematch: 1, sectionmatch:
  • Follow Us: