72-anyos nga Chinese nawala sa hotel

CEBU, Philippines - Padayong gipangita ang 72-anyos nga babayeng Chinese nga turista human kini nilakaw sa iyang gipuy-an nga inilang hotel sa Osmeña Blvd., Dakbayan sa Sugbo kagahapon sa alas 4 sa buntag. Ang Intsik giila nga si Weying Gu.

Matud ni Police Officer 3 Clifton Manogora, desk officer sa Abellana Police Station, nga nidangop sa ilang buhatan ang staff sa hotel ug nipahibawo nga nilakaw ang langyaw ug hangtud sa pagsuwat sa balita wala pa igkita.

Dugang ni Manogora nga kasamtangan nilang gitabangan pagpangita ang tagdumala sa hotel sa maong langyaw kinsa gituohan nga limtanon na sa iyang kaugalingon. (BANAT NEWS)