Pagbalik sa ROTC gihangop ni Davide

CEBU, Philippines - Mipadayag sa iyang pag-uyon si Gobernador Hilario Davide, III alang sa mandatory program sa Reserve Officers’ Training Course (ROTC) ngadto sa Grade 11 ug 12 sa tanang publiko ug pribadong eskwelahan.

Matud ni Davide nga ang mga kadete sa ROTC mga reserve soldier kini nga moprotekta sa nasud.

Gawas niini, panahon sa emerhensiya kun dunay kalamidad, daku usab kaayo nga tabang ang mga kadete sa pagtubag sa mga emerhensiya. Niadtong Martes, si Presidente Rodrigo Duterte miaproba sa pagbalik sa ROTC diin mandatory kini sa Grade 11 ug 12 sa publiko ug pribadong tunghaan.

Ang proposal gi-forward kini ngadto sa Kongreso ug sa Senado ug gi-certified as urgent kini sa presidente.

Giingong ang ROTC magtisok sa mga alimpatakan sa estudyante kabahin sa patriotism, pagmahal sa nasud, moral ug spiritual values, respeto sa isig ka tawo ug sa Constitution.

Giingong ang “Anti-Hazing Law” estriktong ipatuman aron wala’y mahitabong hazing ngadto sa mga kadete.

Sa plano sa pagbuhi sa ROTC, dunay mga estudyante nga wala makauyon niini kay nabalaka silang motumaw na usab unya ang kurapsiyon sa mga ROTC units ug pagpangabuso sa mga estudyante. Base sa report niadtong tuig 2001, gipahunong ang ROTC tungod sa mga isyu sa korapsiyon ug pagpahigayon og hazing ngadto sa mga estudyante diin tungod sa giingong hazing usa ka estudyante sa mga eskuwelahan sa Manila ang namatay.

Ang ROTC mitanyag kini og optional program ubos sa National Service Training Program (NSTP) pinaagi sa Akta Republika 9163.

Ang component sa NSTP naglangkub sa Civic Welfare Training Service diin ang mga estudyante gi-required sa pag-apil sa community service program ug Literary Training Service diin ang mga estudyante gitugotan nga makatudlo og basic skills ngadto sa publikong eskuwelahan. (BANAT NEWS)