E-F Surplus naglawig na

CEBU, Philippines - Segurado na nga moabante sa sunod nga hugna ang E-F Surplus human mikulit sa ikasiyam nilang daog pinaagi sa pagpilde sa Blizzard, 75-64 sa      6th Conference  J&J Ballclub basketball tournament niadtong Lunes didto sa Talit’s Garden open court sa Tayud, Lilo-an.

Ning higayona, si Ken Nuñez  maoy nangu sa  E-F Surplus nga mipatuasik og 19  puntos. Dili kaayo maayo ang performance  ni team owner  Fury Trazona nga igo lang siya mitampo og 11 puntos.

Si Tata Betinol miamot og 13 puntos, samtang si Anton Tranghia adunay 10 puntos sa E-F Surplus  nga  nagbitbit og  9-1 record.

Bugnaw kaayo ilang duwa sa nag-unang duha ka kuwarter hinungdan nga nabiyaan sila. Nagsugod ang ilang kainit sa fourth period sa pagpangulo ni Fury nga maoy miduslit sa nagdilaab  nilang  ataki.

Ang nagtusak-tusak nga tres ni Fury maoy nakalagsik sa mga batos sa E-F Surplus hangtod nga milabaw sila og otso puntos. Wala na sila mohatag pa og higayon nga mailog og balik sa Blizzard ang labaw hangtod sa nahuman ang duwa.

Ang 4-4 nga Blizzard gipangulohan sab ni Francis Suico nga miburak og 20 puntos, gisundan nilang Rommel Bucatan ug Junry Linao sa ilang 14 ug 11 puntos.

Sa laing duwa, ang J/J Surplus milubong sa Val Team, 74-57 alang sa ilang 5-4 nga baraha.

Sila si A. Momo ug C. Alinsug maoy responsabli sa kadaugan sa J/J Surplus ni team owner Henry Agbon nga nagkumbinar og 49 puntos. Si Momo miantog og 26 puntos, samtang si Alinsug mihirit og 23 puntos.

Mipabuto og 22 puntos si L.A. aron mao sab ang mangu sa Val Team. Sila si Paul Retuya ug Arisdel mitampo’g 10 puntos matag usa sa Val Team nga adunay 3-6 win-loss record.

Nakarekober ang Narasaki gikan sa ilang kapildihan dihang ilang gipahimungtan ang Villa Rina Subdivision, 71-62.

Gipangulohan ni Harold Javier ang Narasaki ni team owner Mataji Naraski nga mikabkab og 23 puntos. Sila si Jojo Ybañez ug E. Mantuhac parehong mitimang og 17 puntos, samtang si Russel Gungob adunay 14 puntos sa 4-6 nga Narasaki.

Sila si Paul Abenaza, James Arnado ug Cacang parehong miantog og 12 puntos aron pangulohan ang Villa Rina Subdivision nga nagbitbit og 1-8 nga baraha.

Ubos sa bendisyon ni J&J Ballclub president Henry Agbon, ang mga duwa gipadagan ni league commissioner Fury Trazona inabagan nilang Melio Perez, Gener Estrera ug Choy Pilapil.

Puntos matag usa

Unang duwa:

E-F SURPLUS (75) – Nuñez 19, Betinol 13, Fury 11, A. Tranghia 10, A. Sabang 5, Caballes 4, C. Sabang 4, Palo 4, Layese 3.

BLIZZARD (64) – Suico 20, R. Bucatan 14, Linao 11, Malasa 8, Villagas 8, Judilla 4.

Ikaduhang duwa:

J/J SURPLUS (74) – A. Momo 26, C. Alinsug 23, Astellero 6, Oroyan 6, J. Echivere 6, Genteroliso 5, B. Echivere 2.

VAL TEAM (57) – L.A. 22, Retuya 10, Arisdel 10, Cortez 7, Tajanlangit 6, Tuico 2.

Ikatulong duwa:

NARASAKI (71) – Javier 23, E. Mantuhac 17, Ybañez 17, Gungob 14, R. Salve 7, Tampus 2.

VILLA RINA SUBD. (62) – Abenaza 12, Arnado 12, Cacang 12, Nadoc 8, Enoc 6, De Arca 4, Dumon 2, Pepito 2, Gens 2. (BANAT NEWS)