Higanteng managsuon moduwa sa UV

CEBU, Philippines - Lig-on nang daan ang University of the Visayas (UV) Green Lancers, apan mosamot pa og kalig-on ang ilang puwersa gumikan kay adunay duha ka higanteng managsuon nga madugang sa ilang line-up nga seguradong makapakurog sa tuhod sa ilang mga karibal sa umaabot 17th Cebu Schools Athletic Foundation, Inc. (CESAFI) basketball season nga sugdan karong Agosto diha sa Cebu Coliseum

Kini human sila si Jossier ug Janner Hassan gikan sa Zamboanga mipadayag sa ilang interes nga mosud sa UV Basketball.

“As of now, my brother and I are committed to play for UV. We are just waiting for our enrollment to be processed and be accepted by the school,” matud pa ni Jossier.

Parehong adunay gitas-on nga 6-foot-5, ang mga Hassan wa’y duda nga makadugang og kabangis sa line-up sa Lancers. Segurado sab nga mamahimo sab nga sunod nga sentro sa atraksiyon sa liga sukad nilang Greg Slaughter ug June Mar Fajardo dul-an sa usa ka dekada na ang milabay.

Ang dili maayong balita sa ilang mga kontra mao nga mosud dili sa usa ka team ug sa UV Lancers pa nga sa kanunay tinamod nga koponan ug dunay mabulokon nga kasaysayan.

Sa high school, ang mga Hassan miduwa  uban sa managlahing team. Si Jossier didto sa Ateneo de Manila Blue Eaglets, samtang si Janner nagsul-ot sa uniporme sa Far Eastern University Baby Tamaraws sa UAAP diin sila parehong midaog og kampiyonato.

Ang 17-anyos nga si Jossier sakop sa Blue Eaglets nga naghari sa UAAP Season 77 niadtong 2015, samtang si Janner, 21-anyos, sakop sa Baby Tams nga nanghawod sa UAAP Season 74.

Ilang gibutyag nga ang talent scout sa UV nga si coach Van Halen Parmis maoy nag-recruit kanila ug wala nila palabya ang kahigayonan sa pagtuo nga mahatagan sila og daghang oportunidad uban sa Lancers.

Sa ilang gitas-on ug talento, daghan nga mga teams didto sa Manila ang interesado nga mokuha nila, apan ilang gipili ang UV.

“We accepted the offer of the school because we know we will have more opportunities to experience here. We can assure that we will give our best effort and dedication to help the team win,” matud pa ni Jossier.

Sa iyang bahin, si Parmis wa’y kasudlan sa iyang kalipay kay iya gyud nga nabuhat ang gihulagway niyang usa ka malisud nga tahas.

“I must admit, it was not an easy deal. The boys coming from a highly respected family in Mindanao with the likes of Ateneo and USC as competitors, I almost gave up," matud pa ni Parmis nga unang nakasigpat sa abilidad ni Jossier atol sa 3-on-3 basketball event sa Batang Pinoy National Championships sa miaging tuig didto sa Tagum City.

 “But being in this business for sometime now, I took the challenge to fuel my determination to win the boys. I made the first step by pursuing the father directly. Their transfer to UV is indeed a blessing to the team. And definitely an answered prayer for me, I must say,” dugang pa ni Parmis. (BANAT NEWS)