Kay dili gayud siya bogo

CEBU, Philippines - Nagtubo siya nga kuwang og pagsalig sa iyang katakus gumikan usab sa mga sungog-sungog nga iyang natagamtaman nga nitanom og pagduda na hinuon kun unsa gayud ang iyang abilidad. Kutob lamang elementarya ang iyang inahan samtang ang iyang amahan wala makatiwas niini. Apan naningkamot ang iyang mga ginikanan nga sila si Virginia ug Alfredo Destajo aron silang mga managsuon makatapos gayud og kolehiyo pinaagi sa pagbaligya og isda didto sa Surigao City.

Ang ilang kawad-on maoy nagdasig sa 21-anyos nga si Alvin Joy Destajo, lumad nga taga Nueva Extension, Surigao City, Surigao del Norte aron mulampos gayud siya sa iyang pagtungha dinhi sa Sugbo. Consistent dean’s lister si Alvin sa Cebu Institute of Technology-University diin nitapos siya og kursong BS-Civil Engineering sa nilabay nga buwan.

Ikatulo sa upat ka managsuon si Alvin, kinsa nipaambit nga buot gayud unta sa iyang inahan kaniadtong mupadayon sa pagtuon apan wala tugti sa inahan niini kay matud pa usik-usik ra og kwarta ang mutungha nga magminyo ra man gihapon.

“Kinder pako kay ma-honor na gyud ko, pero adtong tayma kay dili gyud ko makaingon nga brayt ko,” pasiuna pa ni Alvin sa paghinabi sa Banat Tingusbawan.

Dos pesos ang bawon ni Alvin niadtong nagtungha siya sa Surigao City Elementary School, hinungdan nga dili siya mugawas sa classroom kun recess. Hangtud nga nakabantay ang iyang magtutudlo niini ug mao na kini mulibre og snack niya.

“Lisud gyud kaayo kay isda ra man ang negosyo sa akong parents. Sa usa ka adlaw kay P300-500 ang ilahang limpyo nga halin,” butyag pa niya.

Laing suliran niya mao ang iyang pagkamasakiton diin dunay higayon nga duha gyud siya ka buwan nga wala nitungha tungod sa balatian nga wala hingpit nga natino sa doktor. “Gusto nako mamatay na lang ko, ganahan nako mo-give up kay daot na kaayo ko sa tanan,” niya pa.

Tungod sa iyang pagkamasakiton, wala na siya nalakip sa mga outstanding students apan dako gihapon siya og grado hinungdan nga nakatungha siya sa pribadong eskwelahan sa high school. Libre siya og tuition fee sa St. Jude Thaddeus Institute of Technology, ug libro ra iyang bayran sanglit dako ang iyang general average sa elementarya.Naglisod gyud sila adtong panahona gumikan kay nagdungan sila og tungha sa iyang duha ka mga maguwang sa mga pribadong eskwelahan.

“Gituyo gyud ni mama nga private me paeskwelahon bisan maglisod siya,bisa’g isda ra ilang pangita. Unsa ra man daw na kung makahuman me og eskwela,” niya pa. Dili sab nindot iyang kasinatian  uban sa iyang mga classmates sanglit kanunay siya nga sungogon nila nga bogo. Bisan og komedya ra ang pipila niini, apan nadutlan gihapon siya.

“Sensitive man kaayo ko, mura’g makaingon ko nga hala tinuod guro ba,kay I think dili pa gyud enough akong nakat-onan,” hinumdom pa ni Alvin.

Miangkon si Alvin nga maghilak siya kaniadto kun ingnon siya og bogo sa iyang mga klasmet apan tungod niini, mas naningkamot siya aron mapamatud-an ang iyang katakos.

Maayong laki si Alvin sa mga extra-curricular activities apan nabatyagan niya nga dili gyud siya kanunay maapil sa mga inter-school quiz ball competition gawas lamang sa pag-apil niya og Journalism contest sa ilang division diin gideklara siyang mananaog. Giangkon niya nga mauwawon ug hilomon siya nga pagkatawo, hinungdan nga mangiwit siya sa oral recitation, apan kanunay siyang mag-una sa mga written exams.

Gideklarang Valedictorian si Alvin sa ilang tunghaan nga wala gyud niya damha. Pagkahibalo sa iyang inahan kay nihilak kini  og maayo ug gikugos siya sa iyang amahan gumikan sa kalipay.

“Kabalo ka nalipay ko nagtan-aw nila pero sa akong self kay wala gyud ko nalipay. Feeling nako dili ko deserving kay naluoy ko sa among salutatorian.” Gani, nipadayag siya ngadto sa ilang principal nga iyang ihatag ang award ngadto sa ilang salutatorian, apan wala nisugot ang nahisgutan sanglit wala gyud sila nanglimbong matud pa sa pagkwenta og grado. Nakabentaha matud pa siya gumikan sa iyang extra-curricular activities participation. Gideklara sab siyang Artist of the Year ug Best in Math sa ilang tunghaan.

Pag-abot niya sa Sugbo

Ang inahan gyud ni Alvin ang nagbuot nga anhi sa Sugbo siya magkolehiyo gumikan kay daghan matud pa nga mga nindot nga tunghaan dinhi. Wala nakauyon si Alvin dinhi sa sinugdanan. Nakalitan siya sa iyang palibot ug naglisud usab siya sa pinulongan.  Gani sa iyang unang adlaw dinhi ganahan na kaayo siyang mubalik og Surigao. Apan iyang natugkad nga mas hayag ang iyang kaugmaon kun dinhi siya mupadayon sa iyang pagtuon.

Nasayran nga P4,000 lamang ang iyang monthly allowance, diin dinhi kuhaon ang bayad sa iyang gipuy-an. Architecture ang una niyang kurso apan nibalhin siya og Civil Engineering gumikan kay wala siya nakauyon sa mga subjects. Kay valedictorian man siya sa high school, nakadawat siya og scholarship sa first year niya. Apan naputol kini dihang napakyas na siya pagsulod sa Top 50 students sa ilang tunghaan. Apan bisan wala na siya’y scholarship,lakip gihapon siya sa dean’s list sukad sa first year hangtod fifth year. Normal matud pa siya nga estudyante diin mulaag usab siya matag karon ug unya.Apan, “Before ko moadto sa bar, nagtuon nako ana. Mo-disco na gani ko, nag-memorize gihapon ko ana. Haha.” Kun lingion ni Alvin ang dalan nga iyang gisubay paingon sa iyang nahimutangan karon, ang labing dakong pagtulun-an nga iyang napupo mao ang hingpit na gyud niya pagbaton og pagsalig sa iyang kaugalingon.

Bisan pa man sa iyang pagduha-duha sa iyang kapasidad ug kaalam kaniadto, mapasigarbuhon na nga mosulti siya karon nga dili na siya bogo ug mas nagpokus siya sa iyang abilidad.

Tambag niya sa mga estudyante nga angayan gayud nga mag-ampo kanunay sa Ginoo, kanunay magpasalamat Kaniya ug labaw sa tanan likayan ang  tentasyon samtang nagtungha.

 “Kun naay mga tentasyon, block it off.” Panapos pa niya. (BANAT NEWS)