Magandang relasyon ng Pinas, China balik normal na

MANILA, Philippines - Umaasa si Chinese President Xi Jinping na maibabalik na ang magandang relasyon ng Pilipinas at China matapos ang kanilang bilateral meeting sa Great Hall of the People sa Beijing, China kaugnay sa 4-day state visit ni Pa­ngulong Rodrigo Duterte.

Sinabi ni President Xi Jinping, ang pagbisita ni Pangulong Duterte sa China ay inaasahan niyang lalong magpapatatag sa relasyon ng Pilipinas at China na nagkalamat dahil sa isyu ng agawan ng teritoryo sa South China Sea.

Dumating si Pangulong Duterte sa Beijing kasama ang mahigit 200 business delegations.

Siniguro naman ni President Xi kay Duterte na ang Pilipinas at China ay tulad ng magkapatid na dapat magtulungan at ayusin na lamang ang anumang hindi pagkakaunawaan pero hindi naman binanggit ng Chinese leader kung tungkol ito sa South China Sea.

“I hope we can follow the wishes of the people and use this visit as an opportunity to push China-Philippines relations back on a friendly footing and fully improve things,” paliwanag pa ni Duterte.

Inilarawan naman ni Pangulong Duterte na ‘very significant’ ang kanyang pagbisita sa China at indikasyon anya ito ng  ‘springtime’ o sumisibol na relasyon ng dalawang bansa.

“Stretching back centuries, China has been a friend of the Philippines and the roots of our bonds are deep and not easily severed. Even as we arrived in Beijing close to winter, this is the springtime of our relationship,” wika naman ni Duterte kay President Xi matapos ang welcome ceremony sa Great Hall of the People.

Kung minumura ni Pangulong Duterte ang Amerika pati si US President Barack Obama dahil sa pagbatikos ng mga ito sa giyera kontra droga, puro papuri naman ang ginawa ni Pangulong Duterte dahil sa suportang ipinakita ng Chinese go­vernment sa kanyang drug war.