Opisyal nagpopondo sa ‘tokhang for ransom’ - PNP

MANILA, Philippines - Isang dating mataas na opisyal na nasaktan umano sa all out war ng administrasyon ni Pangulong Rodrigo Duterte ang posibleng nagpopondo kay SPO3 Ricky Sta. Isabel na itinurong sangkot sa kidnaping for ransom ng South Korean trader na si Jee Ick-joo.

Ayon kay P/Sr. Supt. Albert Ignatius Ferro, Director ng PNP Anti-Illegal Durgs Group, sumasakay umano sa impluwensya ng naturang dating mataas na opisyal si Sta. Isabel kaya malakas ang loob nitong gumawa ng iligal na aktibidades.

“Meaning to say he might be well-funded and we might be into a situation where somebody is funding especially our enemies in the illegal drugs,” pahayag ni Ferro.

Si Sta. Isabel ay boluntaryong sumuko at nagpasai­lalim sa kustodya ng National Bureau of Investigation (NBI) noong Lunes matapos iutos ni PNP Chief P/Director Ge­neral Ronald dela Rosa ang manhunt operations laban dito.

Kasabay nito, sinabi ni Ferro na isinailalim na sa ‘res­trictive custody ang isang police colonel at dalawa pang pulis na sinasabing kasabwat ni Sta. Isabel sa pagdukot kay Jee Ick-joo.

Ang nasabing police colonel ay ang team leader umano mismo ni Sta. Isabel ng isagawa ang pagdukot kay Ick-joo sa Angeles City, Pampanga noong Oktubre 18, 2016.

Sinasabing si Ick-joo ay pinaslang, dinala ang bangkay sa isang punerarya sa Caloocan City at icrinemate saka nai-flush sa toilet bowl sa comfort room ang abo.

Hinihintay na ang warrant of arrest laban sa mga suspek upang arestuhin ang mga ito.