Ehemplo sa extrajudicial killing

Gisakyan na karon sa Senado ang klaro nga gituyong pagpatay kang Albuera, Leyte Mayor Rolando Espinosa sulod sa Baybay City Sub-Provincial Jail sa niaging semana. Ug miarangkada na karon ang imbestigasyon sa maong kaso didto sa Upper Chamber.

Tuyo sa maong pakisusi ang pag-abli sa tinuod nga sirkumstansiya sa kamatayon ni Espinosa. Apan dako ang pagduda sa tanan nga gituyo pagpahilum si Espinosa aron nga dili kini makapiyait kun si kinsa ang mga protektor sa iyang anak nga si Kerwin, ang giingong usa sa mga drug lord sa nasud.

Bisan ako nagtuo nga drama lamang kadtong gibuhat sa mga pulis nga mironda sa maong bilanggoan. Adunay mas lawom pa sa ilang tuyo nga pag-serve kuno sa search warrant batok kang Espinosa kinsa ilang giakusahang nagpayuhot og druga sulod sa iyang selda.

Makaduda tuod kadtong maong operasyon sa mga sakop sa Criminal Investigation and Detection Group-8 batok sa maong mayor. Kini tungod kay gawas nga kadlawon kadto nila gibuhat, wala usab silay koordinasyon sa nagdumala sa maong bilanggoan.

Ang linuog nga kamatayon sa maong mayor maoy labing tataw nga ehemplo sa mga extrajudicial killings nga kamulong mitay-og sa Pilipinas niining gipakusgan nga krusada batok sa negosyo sa ilegal nga druga sa administrasyon ni Rodrigo Duterte.

Angay lamang nga tutokan sa Kongreso kining maong kaso. Ilabina niining mitumaw nga mga pagduda nga gituyo pagtumba si Espinosa aron dili na kini makapiyait kun si kinsa ang  mga koneksiyon ni Kerwin sulod sa gobiyerno.

Mura’g dili kaipsot ang kapolisan niining maong dakong kontrobersiya. Klaro nga adunay dili maayong motibo nga nagpahipi sa pagpatay ni Espinosa. Ug kini may kalabotan sa mga akusasyon nga adunay mga sakop sa kapolisan ug mga pulitiko nga miprotehir kang Kerwin.

Hinaut nga dili lamang moro-moro ang pakisusi karon sa Senado sa maong sensational nga kaso. Klaro kaayo nga ang nahitabo sulod sa maong bilanggoan sa Baybay City usa ka extrajudicial killing nga gitumong paghilum sa usa ka potensiyal nga witness.