‘Tule Or Not Tule’

Sa ngayong lumaki at tumanda na ako,

Minsan isang umaga ay naisip ito ­­­—

Ano ang isang bagay na dinaanan ko

Ang ‘di sana ginawa o hindi binago?

Alam n’yo ba naisip at ito ay seryo —

Kung maibabalik ko lang ay ‘di sana ako …

NAGPATULI! ‘Wag kayong tumawa that is true!

Trulili! Sana’y nanatiling SUPOT ako!

Ops, sandali’t ‘wag kayong maghuramentado!

‘Di na maisosoli ito op kors I know!

Napag-uusapan la’t you cannot make tukso

At may mga dahilan naman Ang Poet N’yo!

First, pagdating sa ART na nakahiligan ko,

Ang may balat pa ay talagang artistiko!

Halimbawa ay ang kay DAVID na rebulto,

Waring asiwa’t “bastos” pag labas ang ulo!

Ang may balat pa’y ‘di nakakaiskandalo,

Natural ang dating at hindi malisyoso!

At tila may tabing pa s’ya kahit paano,

Palaban kasi pag nakalabas ang ulo!

Hindi sa ano pa man, ‘wag masamain n’yo,

Kapag may suklob may kakaibang misteryo,

‘Di ganap hubad kahit nakahubo tao,

May kilig at kiliting naiiwan dito!

Wala nang magawa’t nakagisnan na ito,

Mula kay Abraham minana na ng tao,

Panunumpa sa Kanya kahulugan nito,

Hindi ba ubrang sa papel na lang o Dios ko?!

But first, TULE ba o TULI? Ano ang ano?

Verb ang TULI, TULE ay adjective and noun too,

Uubra naman kahit ano sa totoo,

Ang SUNGAW ay tuli na hindi nakumpleto!

Kaya nga sungaw ay susungaw-sungaw ito!

Pa-glance, glance lang ‘yung GLANS kumbaga o ‘yung ulo!

Karaniwan ‘yung prepuce o foreskin ni Pedro,

Di masyadong binatak kaya encore tayo!

Kung ‘di nagkakamali nung bata pa ako,

Katumbas ng tuli for the girls ang alam ko

Ay ang pagbutas ng tenga nila kuno!

Totoo ba ito? Mukhang kami’y naloko!

Ang depensa kasi ng mga gurang dito —

Bukod pa sa pagiging isang Kristiyano,

Oks naman tuli pukpok man o siruhano,

Sapagkat malinis ka’t walang keso-keso!

Subalit sa ngayong panahong makabago,

May ilang Hudyo ‘di na gaanong istrikto!

May mga ilan na ring lumalayo rito;

Pumipikit na lang sa “kasunduang” ito!

Noon sa Herusalem nang kami’y magtungo,

Nakita kay Haring David nitso’t rebulto,

May tangang lyre or harp na isang instrumento,

Hawig ipit sa tuli nila naisip ko!

Pagkat ‘yung iniipit sa balat sa dulo,

At nang maproteksyunan nakatagong ulo,

Ito’y lyre-shaped o korteng lira ng musiko,

Sa atin? SIPIT ng sampayan gamit dito!

Masyadong malikot talaga ang isip ko,

Mukha kasing lira ito pag nakita n’yo!

Tunay palang si David tumutugtog nito

At marami s’yang sinulat na mga salmo!

At para nga pala sa kaalaman ninyo —

Kung bakit sa tuli BINYAG din tawag dito,

Noon kasi sabay pagtuli sa sanggol n’yo,

Dun din binibigay ang pangalan nito!

Mabuti na lang hiwalay sa Pilipino,

Dahil kung hindi baka magulat nanay ko,

Pag nakakita ng dugo’t tuloy mahilo,

Ang maibigay na pangalan ko ay RATBU!

Ngek! ‘Wag na lang tuli’t nagbibiro lang ako,

Yung pangalan ko na lang ang papalitan ko —

KING o RANGER sana ang pangalan kong gusto,

Para DE LEON KING o DE LEON RANGER ‘to!