6 Polis, sibilyan patay sa ambush

CEBU, Philippines - Unom ka mga polis ug usa ka sibilyan ang nakalas sa duha apan konektadong  insidente sa pagpangambus nga gidudahang binuhatan sa mga sakop sa komunistang New Peoples’ Army sa Barangay Magsaysay, Guihulngan City, Negros Oriental kagahapon sa buntag.

Apil sa mga nakalas ang hepe sa kapolisan sa maong siyudad nga si Supt. Arnel Arpon kinsa kauban sa iyang mga sakop miresponde sa dapit tungod sa tawag sa konsehal sa siyudad nga kini gi-ambush kauban sa iyang drayber diha sa maong dapit.

Ang maong konsehal mao si Guihulngan City Councilor Edison Dela Rita nga nagpuyo sa Barangay Balugo nga sunod nga barangay sa Magsaysay diin nahitabo ang pagpamanhig.

Sumala pa nga si Dela Rita sakay og motorsiklo nga gimaneho sa iyang drayber nga si Michael Hambalos dihang pag-abot nila sa dapit kalit silang girakrakan sa mga armadong mga lalaki nga gituohang mga sakop sa New Peoples’ Army.

Namatay ang drayber ni Dela Rita samtang nakalayat sa bakilid ang konsehal ug nakahimo pagtawag sa Police Station gamit ang iyang cellphone ug nagpahibalo nga sila gi-ambush.

Giporma dayon ni Supt. Arpon ang kinse niya ka mga sakop luwan sa mga motorsiklo ug Mahindra patrol car pag-adto sa lugar.

Apan sa dayon nilang pagsaka sa subidahon ug likoon nga dalan kalit silang girakrakan sa gibanabanang 60 ka mga NPAs.

Matud pa nga duha ka mga M60 machineguns ug mga tag-as nga kalibre sa armas ang girakrak sa mga polis.

Si Arpon luwan sa patrolcar kauban iyang mga sakop samtang adunay nag-una kanila nga mga nagmotor nga polis dihang nahitabo ang insidente.

Gawas ni Arpon nga PNPA Class 98, namatay usab ang iyang mga sakop nga silang PO2 Alfredo Dunque,  PO2 Alvin Bolandres,  PO3 Teovic Agusto, SPO2 Nicasio Tabilon ug SPO1 Jesael Ancheta.

Silang tanan ang sakay sa Mahindra patrolcar samtang ang laing unom nga nagsakay og motorsiklo nakalingkawas sa ambush.

Naangol usab silang PO3 Jordan Balderas, PO2 Jury Maribao ug SPO4 Jerome Delara nga daling gidala sa tambalanan sa Dumaguete City.

Usa sa mga naka-survive nga polis mitug-an nga si Arpon gidul-itan pagtiwas sa mga rebelde.

Si Police Supt. Carlos dela Cuesta, Deputy for Operations sa Negros Oriental Provincial Police Office kinsa nahimo usab nga hepe kaniadto sa maong siyudad miingon nga ambush area ang Sitio Mandi-e  sa barangay Magsaysay tungod kay tungason ang dalan ug likoon ug adunay pangpang sa kilid niini samtang tiilan sa laing pangpang ang pikas     niini.

Matud pa niya, base sa sitwasyon ug diin nipwesto ang mga rebelde (sa mas taas nga pangpang sa kilid)  nga armado og M60 machineguns ug uban pang high-powered firearms, lisod gyud nga makalingkawas ang sakay sa patrolcar.

Ang mga naaging mga habal-habal drivers mao nay mitabang sa mga nangaangol nga polis padung sa tambalanan, apil si Konsehal Dela Rita kinsa nakaluklok sa kalibonan atol sa ambush.

Giklaro ni Lacuesta nga wala sila magkulang sa intelligence gathering tungod kay heightened alert man sila tungod sa report nga adunay 20 ka gidudahang NPAs gikan sa Bohol nga nag-pumpboat nga nangabot sa ilang dapit niadtong Mayo.

Si PNP provincial director Sr. Supt. Henry Biñas kauban ang mga sakop sa Provincial Public Safety Company ug mga sakop sa 79th Infantry Battalion milusad og hot pursuit operation batok sa mga nangambus nga giingong sakop sa Regional Southern Front sa CPP/NPA.

Si Presidential Assistant in the Visayas Michael Dino gusto nga palawman ang imbestigasyon sa maong insidente. Siya miingon nga andam ang iyang buhatan pagtabang sa pamilya sa mga nakalas ug nangaangol nga mga polis. Si Supt. Arpon mao ang ikaduhang hepe sa kapolisan sa maong siyudad nga napatay sa ambush sa NPA. Niadtong tuig 2004 gi-ambush ug napatay si Sr. Insp. Ramil Viscaya diha sa national highway.

Niadtong tuig 2002 gi-ambush ug napatay usab ang hepe sa kapolisan sa lungsod sa Vallehermoso nga si Insp. Leopito Gallego kauban ang iyang drayber nga si PO3 Cipriano Saludes samtang sila naagi sa Sitio Matu-og sa Barangay Gasak sa  Guihulngan, usa sa iyang sakop ang naangol.

Sama sa nahitabo kagahapon, gi-ambush usab sa mga rebelde ang nirespondeng mga polis nga gikaangol usab sa usa. (BANAT NEWS)