Gamit paghimo’ bomba

CEBU, Philippines - Gironda sa kapolisan ang apartment sa Panglao, Bohol nga giabangan ug balay didto sa Malaybalay, Bukidnon ni Supt. Maria Cristina Nobleza ang giingong nagtinguha unta pag-rescue sa nahibiling mga Abu Sayyaf sa Clarin, Bohol.

Sa giabangan nilang apartment sa Barangay Looc sa Panglao adunay nakuhang C4 explosive, blasting caps, detonating cord ug uban pa sa bagahe sa maong opisyal.

Diha sa Panglao ang venue sa ASEAN Trade Minister Meetings gihimo usa ka semana human sa engkwentro didto sa Inabanga tali sa Abu Sayyaf pinangulohan ni Muammar Askali alyas Abu Rami ug mga otoridad niadtong Abril 11. Ang engkwentro sa Inabanga miresulta sa kamatayon ni Abu Rami ug tulo niya ka mga kauban, duha ka sibilyan ug upat sa tropa sa gobiyerno.

Apan nakaikyas ang ubang bandido kauban ang local contact ug guide nilang si Joselito Melloria alyas Abu Alih nga taga Napo, Inabanga.

Ang grupo didto nanago sa Barangay Bacani sa lungsod sa Clarin nga silingan sa Inabanga. Ug niadtong Sabado napatay si Melloria ug lain pang tulo ka mga kauban.

Samtang padayon pang gipangita ang nahibilin tulo pa nila ka kauban apil niini ang usa ka alyas Saad nga maoy gustong i-rescue sa grupo ni Nobleza.

Si Nobleza kauban ang kapuyo nga si Reenor Lou Dungon, ug ang tiguwang nga babaye nga sumala pa sa report sa TV Patrol sa ABS-CBN iyaha diay inahan nga si Judith Dungon ug ang 13 anyos nga anak sa laing suspetsadong terorista nga napriso na karon sa Bicutan, na-intercept sa checkpoint sa Army duol sa Barangay Bacani diin napatay silang Melloria.

Matud pa nga alas 8 pasado sa Lunes gabii, niduol kanila ang tag-iya sa apartment nga giabangan nilang Nobleza dala ang mga nabiyaang gamit sa opisyal diha sa apartment human niini nasayran nga gidakop ang mga nag-abang sa iyang apartment.

Sumala pa nga dihang gibuksan ang maong mga bagahe nagtuo lang sila nga sabon ug lipstick ang mga sud niini, apan sa pagsusi og maayo C4 Explosive diay kadto ug mga blasting caps ug mga detonating cord.

Gisusi pa sa Panglao Police kun plano bang gamiton sa pagpamomba sa ASEAN meet didto ang maong mga bomba.   

Bukidnon raid

Samtang gironda usab sa kapolisan ang balay ni Nobleza didto sa Malaybalay City sa Bukidnon nga nahimutang sa Pine Hills Executive Homes, Purok 5, Barangay Casisang, sumala pa sa report sa GMANews.Tv.

Ang mga sakop sa Criminal Investigation and Detection Group-Bukidnon armado og search warrants gikan ni Malaybalay Regional Trial Court  Branch 9 Executive Judge Ma. Theresa Aban-camannong.

Nakuha gikan sa iyang balay ang usa ka M16 rifle, pito ka magazines niini, usa ka cal. 45 pistol nga may bala, 218 ka bala sa M16 rifle, ug usa ka bandoleer.

Apil sa nakuha ang usa ka yellow timer nga sagad gamiton paghimo og improvised explosive device, bomb component/improvised explosive device, soldering iron, 66 non-electric blasting caps, 9 bolts battery,  tester, ug nagkalain-laing subersibong mga dokumento nga nakasuwat ang mga kalihokan sa terorista.

Naabtan diha sud sa balay ang mga paryente ni Dunggon nga si Al Mohammar Bayani, 22, ug duha ka minors nga pulos taga  San Juan, Baroy, Lanao del Norte.

Kagahapong adlawa, gidala ni Chief Supt. Noli Taliño, director sa Police Regional Office 7 silang Nobleza ug Dungoon sa Camp Crame subay sa mando ni PNP Chief General Ronald “Bato” Dela Rosa.

Sumala pa ni Taliño, ilaha nang napasakaan og kaso ang mga dinakpan lakip na usab ang usa ka tigulang nga sakay nila Nobleza sa dihang kini sila gipara atol sa checkpoint.

Naalaan ra

Dili sakop sa Abu Sayyaf ang gi-pickup sa mga polis sa Clarin kagahapon sa buntag didto sa Barangay Bacani  nga una nilang gidudahang bandido kay lago ug dili masabtan ang sinultihan.

Matud pa ni Police Officer 1 Janew Villame sa Clarin Police Station sa Banat News  ala-una sa hapon gibuhian ang maong lalaki nga gitawag nila og “Richard” human adunay nikompirmar nga kini taga Catigbian, Bohol ug gikuha kini sa tagtungod.

Dugang pa ni Villame, nagdala kini og sako ug lago kaayo apan ilang nasayran nga may kakulian diay kini sa pangisip maong naabot og libud-suroy sa ilang lungsod.                            Papason ang ASG

Mga kabanay sa nakalas nga si 2nd Lieutenant Estelito Saldua Jr. nanawagan sa gobiyerno nga papason ang ASG dinhi sa nasud.

Sa eksklusibong pakighinabi sa Banat News, ang igsuon ni Saldua nga si Shiey Li-yen Saldua  gusto nga mahurot ang maong mga bandido.

Matud pa niya, bisan kadaghanan sa mga nakapatay sa iyang igsuon ug apil na ang mga kakunsabo nangadakpan, kuwang pa kini.

Nagpasalamat hinuon siya nga wala sila gipasagdan ni President Rodrigo Duterte. Si Saldua gilubong na niadtong adlaw nga Domingo nga naatol usab sa samang adlaw sa paglubong ngadto sa mass grave sa upat ka bandidong napatay didto sa Clarin.

Ang napatay nga si Saldua, nagkuha sa kursong Engineering, usa ka scholar sa De Lasalle Lipa ug gustong motabang sa iyang nasud hinungdan nisulod sa Philippine Military Academy.(Rowena Capistrano ug report gikan sa Wires/EIM)

Duha gipamusil patay

Patay ang duha ka tawo nga gipamusil sa gawas sa ilang panimalay diha sa Ka Juan Fuentes Road, Barangay Pajac, Dakbayan sa Lapu-Lapu sa miaging kaadlawon.

Si Senior Police Officer 2 Allan Frederick Pantaleon sa Homicide Section sa LLCPO miila sa namatay nga mao si Avelino Apas Selocia, 37, nagpuyo sa maong dapit.

Samtang atol ning pagsuwat sa balita padayon pang giila sa kapolisan ang laing patay’ng lawas tupad ni Selocia kay way nakaila kaniya diha sa lugar.

Si Bernadita Selocia, inahan sa gipatay nga si Avelino  mitug-an ngadto sa mga imbestigador nga nagkaon siya dihang nakadungog siya og butobuto sa armas.

Dali niya kining gisusi ug iyang nakita ang patay’ng lawas sa anak ug laing usa ka tawo nga nagbuy-od na sa yuta.

Si Pantaleon miingon nga ilang nakaplagan ang 12 ka mga basiyo  sa bala sa kalibre .9mm nga armas diha sa crime scene ug 12 ka gagmay nga paketeng shabu gikan sa mga biktima.

Nagduda sila nga may kalambigitan sa ilegal nga drugas ang pagpusil sa mga biktima.

Samtang giimbestigar nila karon ang laing kaso sa pagpamusil nga nakaingon sa pagkaangol nilang Jade Ryan Racasa nga taga Barangay Tabunok, Dakbayan sa Talisay ug Cris June Rapsing nga taga Suba Masulog, Basak sa maong dakbayan.

Matud pa nga gikan sa Hoopsdome sa Barangay Gun-ob ang duha ug naagi sa grupo sa mga batan-on sa Barangay Pajo dihang kalit silang gipamusil.

Ang duha daling gidala sa tambalanan ug wala pa masayod ang kapolisan kun si kinsa ang mga namusil kanila. (BANAT NEWS)