Villanueva makigpinaksitay na ni Tete
CEBU, Philippines - Nagtinguha si ‘King’ Arthur Villanueva sa ALA Boxing Gym nga mosikit og maayo sa iyang ambisyon nga makaaway og balik alang sa world title sa dihang iyang sangkaon ang South African nga si Zolani Tete sa usa ka WBO bantamweight eliminator karong adlawa didto sa Leicester Arena sa England.
Si Villanueva, ang kasamtangang WBO Asia Pacific 118-pound champion, nagbitbit og 30-1 record uban ang 16KOs. Ang bugtong niyang pilde pinaagi sa kontrobersiyal nga technical decision batok ni Puerto Rican McJoe Arroyo atol sa ilang IBF super flyweight championship match duha na ka tuig ang milabay.
Sa iyang bahin, si Tete dunay rekord nga 24-3 uban ang 20KOs. Ang kanhi WBF fly-weight ug IBF junior bantamweight champion gikan sa walo ka sagunson nga daog, unom niini pinaagi sa knockout, sukad siya napilde ni Roberto Sosa niadtong 2012.
Gikatakda unta silang mag-abot niadtong Abril 8, apan gisibog ang ilang away aron paghatag kanila og igong panahon sa pagpangandam.
Ang modaog sa sangka nilang Villanueva ug Tete makaangkon og katungod nga mohagit sunod ni WBO bantamweight champion Marlon ‘Nightmare’ Tapales. Kana kun si Tapales molampos sa una niyang depensa batok sa Hapon nga si Shohei Omori, kinsa iyang gipakatug sa miagi nilang engkuwentro ugmang adlawa didto sa Edion Arena sa Osaka, Japan.
Kun ugaling sila si Villanueva ug Tapales magmadaugon, daw sa dili malikayan ang posibilidad nga duha ka Pinoy’ng boksidor ang mag-engkuwentro alang sa usa ka world title. (BANAT NEWS)
- Latest
