PNP: Publiko ligtas sa public transport terminals

MANILA, Philippines -  “The public are all safe, we are all safe!”

Ito ang tiniyak kahapon ni Philippine National Police (PNP) Chief P/Director General Ronald dela Rosa matapos na pa­ngunahan ang pag-iins­peksyon sa mga pampublikong terminal sa Metro Manila kaugnay ng paggunita sa Semana Santa.

Sinabi ni dela Rosa na sa kabila ng posibleng banta ng terorismo ay walang dapat ikatakot  ang publiko dahil nakaalerto ang kapulisan at maging ang mga counterparts nito sa iba pang law enforcement agencies ng pamahalaan.

“Everyone is working, your government is working, your security forces particularly the PNP is working hard to ensure our safety,” pahayag ni dela Rosa.

Kahapon ay unang ininspeksyon ni dela Rosa kasama sina QCPD Director Guillermo Elea­zar at National Capital Region Police Office (NCRPO) Chief P/Director Oscar Albayalde ang Araneta-Cubao Bus terminal.

Upang ipakita ang kahandaan ng pulisya sa banta ng terorismo ay nagsagawa ang mga ito ng simulation exercise kung saan ang scenario ay may nakitang bomba sa nasabing terminal bandang alas-9:38 ng umaga kahapon.

Ang bomba na nadiskubre ng guwardiya sa Araneta bus terminal ay nakasilid sa kulay itim na bag na may cellphone at mga kable na naiwan sa nasabing bus terminals.

“The simulation was meant  to determine the level of preparedness for local or foreign terror attacks, as the exodus of the people to the provinces begin this Holy Week,” pahayag ng opisyal.

Ipinamalas rin ng mga K9 units, mga personnel ng QCPD Public Safety Battalion, Explosive Ordnance Disposal unit ang mabilis na pagresponde sa naturang bomba.

Sa pamamagitan ng isang MK3 caliber ICOR robot at disruptor water cannon ay na-detonate ng mga awtoridad ang natagpuang bomba.

Matapos ito ay sumakay rin ng MRT si dela Rosa at iba pang PNP officials para inspeksyunin din ang seguridad na ipinatutupad dito.

Nag-inspeksyon din sina dela Rosa sa bisinidad ng Baclaran Church, Ninoy International Airport (NAIA) at maging sa mga daungan sa pier sa Maynila.