Ibalik na ang towing

Kay mayoriya na man gyud ang Bando Osmeña Pundok Kauswagan (BOPK) diha sa Cebu City Council, angay na gyud tingali nga himoan og ordinansa ang pagbalik sa towing operation sa mga sakyanan nga ipataka lang pag-parking daplin sa karsada ug aseras.

Kaniadto, mura’g mag-ukon-ukon pa si Mayor Tomas Osmeña kay basin og ang iyang tinguha nga ibalik ang towing operation mapakyas lang kay mayoriya pa man ang Team Rama diha sa City Council.

Nasayod ko nga gawas sa mga konsehal nga alyado sa BOPK, may mga konsehal pa gani sa Team Rama nga uyon sa pagpatuman pagbalik sa towing operations. Kining mga tag-iya’g sakyanan nga magpataka lang pagparking diha sa daplin sa karsada, nakapasamot sa problema sa trapiko.

Angay’ng tudloan og leksyon kining maong mga tawo. Dili ikalimod nga misamot ang problema sa trapiko dinhi sa dakbayan tungod kay daghan sa mga tag-iya’g sakyanan gihimong parking area ang karsada.

Pinaagi sa pagbalik sa towing operation, mahapsay pa ang atong karsada kay mahadlok na man ang mga tag-iya’g sakyanan nga magpataka’g parking, ingon man mokita pa ang dakbayan gikan sa multa ug towing fee sa mga tag-iya sa sakyanan nga maguroy.

Kinahanglang tudloan gyud ang mga tag-iya’g sakyanan nga mahimo sila nga responsable, ug dili kay magpasuwabi ang ilang pagka abusado.

* * *

Pastilan, usa ka 12-anyos nga babaye gitabangan paglugos, gibanus-banosan sa pag-among-among sa duha ka lalaki didto sa Barangay Tuyom, lungsod sa Carcar. Kun giaprobahan pa nga ang makahimo pagpanglugos silotan og kamatayon, posible nga ang mga naghimo sa pagpanglugos mahadlok unta.

Kun ikaw pa ang amahan sa maong bata, unsa kaha ang imong bation? Dili kaha ka makahuna-huna og panimalos ngadto sa naghimo sa linuog nga binuhatan ngadto sa imong anak? Dili kaha ka mobati’g kasilag sa mga kongresista nga mipabalik sa death penalty law apan wala iapil ang rape sa mga kaso nga makonbikto og kamatayon ang naghimo?

Alang kanako, ang mga rapist angay gayud nga pamatyon. Kinahanglan nga dili na paabton og dugay gikan sa ilang pagka konbikto, ang mga konbiktado angay’ng patyon dayon ug ang matang sa pagpatay angay’ng ipakita sa publiko aron mahadlok ang katawhan nga mohimo og krimen.

Kun aduna may mga tawo nga nakonbikto sa hukmanan bisan og wala sila’y sala, tingali maihap ra sila sa mga tudlo. Dili ka makapaabot nga ang tanang nakahimo og dinagko nga kaso moangkon sa publiko nga sila ang naghimo sa krimen.