Tigpalit og mga butang kinawat gipatay

CEBU, Philippines - Usa ka tawo nga giingong tigpalit og mga butang nga kinawat gipatay sa wala hiilhi nga lalaki didto sa Sitio Mananga 2, Barangay Tabunok, Talisay niadtong Lunes sa gabii.

Sigun sa pasiuna nga imbestigasyon nga si Roque Dula, 50-anyos, minyo ug nagpuyo sa maong lugar gikan nga nangompra sa merkado sa Tabunok ug paingon na unta nga mopauli.

Matud ni PO1 John Xyrus Ilustrisimo sa Talisay City Police Station nga pag-abot sa biktima sa dulhugon nga bahin paingon na sa ilang dapit, didto na siya giatake sa mamumuno nga giingong nagsul-ob og jacket.

Si PO1 Ilustrisimo miingon nga namatay dayon si Dula kay gawas nga nakaangkon og samad-pinusilan sa iyang ulo, nasukarap pa gyud kini sa karsada dungan sa iyang gimanehong motorsiklo.

Adunay nakakita nga mitug-an sa kapolisan nga ang nagpusil ni Dula yano ra kaayo nga misibat.

Gitan-aw karon sa kapolisan nga posibleng adunay nasuko sa biktima tungod sa iyang kalihukan nga maoy mopalit og mga butang nga kinawat. Hinoon padayon pa ang imbestigasyon sa kapolisan aron pagsuta kun kinsa gyud ang nagpatay sa biktima. (BANAT NEWS)