Nagliniwatay ra sila

Ngano nga nisibat man si David Lim Jr. nga maoy gipasanginlang nakapusil sa nurse nga si Ephraim Nuñal tungod sa ilang lalis sa trapiko niadtong alas-3 sa kadlawon sa Domingo sa Kamputhaw, Cebu City, nga mahimo ra man unta siyang mosurender sa kapolisan ug moangkon og responsibilidad sa iyang nahimo?

Nganong gipili man niya ang pagtagu-tago dinhi sa Sugbo (kun tuohan ang Buro sa Imigrasyon nga wa magamit ang iyang pasaporte sa niaging 48 ka oras) o sa Hong Kong (kun tinuod ang kasayuran nga nakasakay siya sa flight gikan sa Mactan paingon sa Hong Kong niadtong Domingo sa udto, siyam ra ka oras human sa duguong insidente)?

* * *

Sama nga mga pangutana ang ikapasupot sa iyang amahan nga si David Lim Sr. kinsa gipasanginlang nakabangga ug nakapatay og lalaking nag-motorsiklo sa flyover sa Archbishop Reyes Avenue sa alas-3 sa kadlawon niadtong Marso 11:

Nganong nisibat man siya nga mahimo ra man unta nga motabang pag-atiman sa biktima, mopaabot sa mga imbestigador sa kapolisan ug mopasabot unsa ang hinungdan sa bangga? Nganong gipili man ang nagusbat niyang sakyanan inay pamatud-an sa mga imbestigador nga wa siya mahubog ni magpaturagas sa pagpadagan?

* * *

Mas lisud sabton ang managsamang pagtalikod sa anak ug amahan sa ilang responsibilidad nga mahimo ra man gyud unta sila nga mopiyansa dayon nga dili kinahanglan nga mogahin og bisan usa lang ka gutlo sulod sa prisohan.

Sama ba si David Sr. sa ubang iresponsable nga mga ginikanan nga nipadako sa ilang mga anak uban ang sayop nga pasalig nga hawod sila ug dili angay’ng mahadlok ni bisan kinsa? Ug sama ba si David Jr. sa ubang utu-uto nga mga anak nga nipaundayon sa binuang sa mga ginikanan?

* * *

Nahadlok ko nga ang tinuod nga hinungdan nga gihimo kadto nila ni David Sr. ug David Jr. kay nagtuo sila nga mahimo nila bisan unsay ganahan nilang himuon, busa wa’y arang nila bisan kinsa ang maigo sa bisan unsa nilang mahunahunaan.

Nabalaka ko nga nisunod si David Jr. sa nahaunang salida sa iyang amahan nga si David Sr. Labaw ko nga nabalaka nga si David Sr. nadasig kay wa’y nakatandog sa iyang maguwang nga si Peter Lim. ([email protected])