Piniriso maoy jail guard

Kasalawayon gud sa gihimo sa pipila ka guwardiya sa Cebu Provincial Detention and Rehabilitation Center (CPDRC) nga mitugyan sa yawe sa mga selda sa bilanggoan ngadto sa mga piniriso.

Kon tinuod man gani kini, wala gyud kini sa Jail Manual ug ang naghimo niini angay'ng silotan. Napugos diay ang mga ahente sa Philippine Drug Enforcement Agency (PDEA-7) ug mga militar sa pagguba sa kandado kay dugay'ng nakit-an ang yawe.

Wala dayon makapakita ang mga guwardiya sa yawe sa mga selda atol sa kinalit nga raid. Taud-taod, dunay usa ka piniriso nga giingong niabot og nagdala sa pungpong sa mga yawe sa selda.

Angay'ng ipaimbestigar kini ni Gobernador Hilario Davide III ug kinahanglan nga dili siya magpanuko sa pagpahamtang og silot. Kon mao man gani kini, mahimo ra nga manglayas ang mga binilanggo?

Mao diay nga manglusot ang shabu ngadto sa sulod sa bilanggoan kay dili imposible nga adunay mga jail guard nga kakunsabo sa mga drug pushers. Tiaw mo, dunay piniriso nga nakuhaan og bank book nga ang kuwarta kapin sa P1 million.

* * *

Kon dili man gyud mandoan ni Mayor Tomas Osmeña ang mga sakop sa PROBE Team sa pagpaspas sa ilang clearing operation batok sa mga nag-ukopar sa mga aseras, moabot ang higayon nga mogamay na pag-ayo ang karsada nga agianan sa mga sakyanan, kay anha na man ang mga tawo molakaw.

Unya, kon padayong pasagdan lang ni Mayor Tommy ang abuso sa mga tawo nga nagpuyo daplin sa kasapaan nga nakapagamay sa mga sapa, moabot ang higayon nga mograbe ang paglunop sa tubig sa mga lupa nga dapit kun mag-uwan.

Nakasabot ko nga si Mayor Osmeña "busy" kaayo sa pagpaninguha nga ang mga magpapatigayon mobayad gyud sa tukmang buhis, apan nataligam-an niya ang paghawan sa atong mga aseras ug daplin sa karsada, ingon man ang miabuso sa mga sapa.

Mao kining bahina nga dili gyud nako tuyoon nga makasaway ko sa mga sakop sa PROBE Team kay gipasagdan ra nila ang mga tawo nga miukopar na sa mga aseras. Kun mosuroy ka sa lainlaing dapit, unya igmaton lang nimo ang imong mga mata, makita nimo ang mga abuso.

Kinahanglan nga tawgon gyud ang atensyon sa PROBE Team kay ila kana nga trabaho ang paghawan sa aseras nga giukopar na sa mga mapahimuslanon. Ang kahulogan sa letra nga "R" sa PROBE mao ang "restoration."

Apan tingali wala makasabot niini ang nagdumala sa PROBE ug ang mga sakop niining maong grupo. Basin og nagtuo sila nga kay nagtrabaho sila sa kagamhanan, mahimo na nga magsuroy-suroy sila sakay sa ilang sakyanan unya maghuwat nga moabot ang tingsweldo.

Wala usab malilong kanato nga kanunay'ng lunopan ang eskina Bonifacio ug Sikatuna sa matag higayon nga adunay uwan. Ang rason niini kay ang kaniadto lapad ug lawom pa nga sapa nga anaa gani milagbas sa Sikatuna Street gikan sa Barangay Day-as, karon gamay na gyud kaayo. Anaay building ug bodega sa nagnegosyo og puthaw diha maoy usa sa mipagamay sa sapa.

Makita nimo base sa karaang tulay aron pag-ila kinsa ang kawatan og puwesto. Angay kini nga gub-on, mayor.