3-anyos na paslit, patay
MANILA, Philippines - Isang 3 anyos na batang lalaki ang namatay nang mabagsakan ng nakasalansang hollow blocks mula sa ginagawang bahay kamakalawa ng hapon sa Old Sta.Mesa, Maynila.
Namatay din habang ginagamot sa San Juan Medical Center Hospital ang biktimang si John Brandon Garcia, ng 4886 Int., 22 San Roque St., Old Sta. Mesa, Maynila dahil sa pagkakabasag at pagkakatusok ng matigas na bagay sa kanang pisngi.
Sa imbestigasyon ni PO3 Aldeen Legaspi, ng Manila Police District-homicide section, naganap ng insidente dakong ala-1:20 ng hapon sa may 4886 Int. 22 San Roque St., Old Sta.Mesa,Maynila.
Naglalaro umano ang bata sa bahay na nire-renovate na pag-aari ni Ronhel Claud, 31, nang aksidenteng mabagsakan ng mga hollow blocks na isinalansan ng construction worker na si Fracisco Barcial Jr.,42.
Nawalan umano ng malay ang biktima nang bumagsak ito nang duguan at kaagad namang isinugod sa pagamutan ni Claud pero hindi na nagising pa ang paslit.
Patuloy ang isinasagawang imbestigasyon ng pulisya para alamin kung may pananagutan si Claud at Barcial sa pagkamatay ng biktima.
- Latest