Barangay maka-inspection sa construction site

CEBU, Philippines - Giawhag sa Office of the Building Officials (OBO) ang kabarangayan sa Dakbayan sa Sugbo nga motabang sa paghimo og inspection sa mga construction project sa tagsa-tagsa nila ka dapit.

Si Cebu City Engineer Joy Ylanan, nga mao usab ang pangulo sa OBO, nipasabot nga adunay ordinansa ang siyudad nga naghatag og katungod sa mga opisyal sa barangay aron maka-inspection sa mga construction project.

Matud ni Ylanan nga tungod sa kakuwang og mga kawani sa OBO, dili sila makaato sa pag-inspection sa mga nagpadayong construction sa dakbayan hinungdan nga ang uban niini dili na masakpan nga molapas sa gilatid nga lagda.

Gipasabot ni Ylanan nga dako kaayo ang matampo sa mga opisyal sa barangay kung motabang sila paghimo og inspection kay masakpan man kadtong mga malapason sa balaud labi na ang nahimutang daplin sa karsada.

Apil sa angay’ng bantayan sa mga opisyal sa barangay mao ang pagsuta kung gituman ba ang gilatid sa balaud nga ang mohimo’g construction nihimo ba og setback kun isibog nila ang ilang construction og pipila ka metros gikan sa utlanan sa ilang property.

Gitumong kini aron may lugar sila nga magamit nga kaparkingan sa mga sakyanan. Sagad nga setback nga gilatid sa balaud sa mga dagkong building, lima ngadto sa walo ka metros gikan sa property line. Sa mga gagmay’ng balay nga nahimutang daplin sa karsada mahimo ra nga ang setback kapin sa duha ka metros gikan sa utlanan sa aseras. (BANAT NEWS)