Silot sa kamatayon

Si House Speaker Pantaleon Alvarez mibutyag nga ang party stand sa PDP-Laban bahin sa sugyot nga ipatuman pagbalik ang silot nga kamatayon mao nga ila kining suportahan. Sa ato pa, seguro na nga maaprobahan kini sa Lower House.

Isip mga sakop sa ruling party, kinahanglang mo “toe-the-line” ang mga kongresista, otherwise, mahimo nga mo-resign sila gikan sa super majority coalition nga alyado ni Presidente Digong Duterte.

“They can resign from the party, I will not force them,” matud ni Alvarez. Tuod, bakikaw kaayong tan-awon nga mosupak ka sa baruganan sa imong partido.

It seems nga ang tumong ning maong pasidaan ni Alvarez dili ang regular nga sakop sa PDP-Laban, kundili, ang mga partido nga nagpasakop sa super coalition, sama sa Nacionalista Party, Nationalist People’s Coalition, National Unity Party, Lakas-NUCD, Laban ng Demokratikong Pilipino, ug ang nasiak nga Liberal Party.

Unsa may mahitabo kun ang constituents sa mga kongresista mosupak pagpabanhaw sa death penalty?

* * *

Uyon kaayo ko nga himoong mandatory ang ROTC, kay kun himoon nga optional, walay mokuha niini, ilabi na nga ang batan-on karon, daghan na kaayo’g mga lingaw, ug ang ROTC alang kanila, samok-samok ug makabalda lang sa ilang mga lingaw.

Disiplina? Love of country? Wala na kini sa ilang dictionary. Mas importante alang kanila ang pagsuroy-suroy sa mga mall, mga imnanan, ug computeran, kay sa magmartsa-martsa isip mga ROTC cadets.

Sa among panahon, nakaagi kami pagka-cub scout, boy scout, PMT ug ROTC. Ug wala kami magmahay sa among nasinati. On the contrary, ni-enjoy mi. Hunahunaa, kauban nakong taga-Opon, sayo kaayo mi nga momata aron dili ma-late sa assembly.

Kining ilang giingon nga corruption ug abuses sa mga nagdumala sa ROTC, wala kini sa among panahon. Hinaot nga kun kini mabalik na sa curriculum sa mga tunghaan, likayan ang mga abuses ug corruption niini, ug dili himoon nga rason sa dili pagbalik sa ROTC.

Sa ako na nga giingon, mas maayo nga himoon kining mandatory kay kun hatagan nato’g kapilian ang ato karong mga batan-on, ang ilang gusto mao gayud ang matuman nga dili sila hasul-hasulon, dili lisud-lisuron, dili badlungon, dili disiplinahon, dili lekturan … kinahanglan kanunay’ng hayahay ang ilang kahimtang, ug hatagan sila’g hingpit nga kagawasan sa buot nilang buhaton. 

* * *

Karon nga ang Jomara Konstruckt maoy midaog sa bidding paghakot sa basura, unsa man diay to nga giingong paboran ni Mayor Tom Osmeña ang Pamocor kay iyang higala ang mga tag-iya niini? Pastilan!