Gang war: 5 patay
MANILA, Philippines - Lima katao kabilang ang tatlong estudyante ang nasawi makaraang pagbabarilin ng kalabang gang sa malagim na insidente sa Biñan City, Laguna nitong Biyernes ng madaling araw.
Kinilala ang mga nasawi na sina Arnel Barce, 17; Ranel Barce, 18; Darwin Villareal, 18; pawang mga estudyante; Rico Laserna, 32 at Mark Robin Ignacio, 27.
Ayon sa pulisya, sina Arnel Barce, Villareal, Laserna at Ignacio ay pawang dead-on-arrival na sa Biñan Hospital habang binawian naman ng buhay habang nilalapatan ng lunas sa Perpetual Help Hospital sa lungsod na ito si Ranel Barce, 18.
Sa report ni Laguna Police Acting Provincial Director P/Sr. Supt. Joel Pernito, naganap ang krimen sa harapan ng Canlalay Elementary School sa Brgy. Canlalay ng lungsod bandang alas-12 ng madaling araw.
Kasalukuyang nasa bisinidad ng nasabing lugar sa tapat ng naturang eskuwelahan ang mga biktima nang ratratin ng mga armadong kalalakihan na pinaniniwalaang kalaban nitong mga gang.
Ayon naman kay Supt. Serafin Petalio, hepe ng Biñan City ang mga suspek at ang mga biktima ay pawang mga magkalabang grupo sa lugar.
Gayunman, sinisilip pa ang ibang anggulo sa naganap na krimen.
Narekober sa crime scene ang 13 cartridge ng cal 9 MM at mga nadepormang basyo ng nasabing mga armas.
- Latest
