6 minasaker sa pot session
MANILA, Philippines – Anim-katao na sinasabing nagpa-pot session ang pinagbabaril hanggang sa napatay ng mga hindi kilalang lalaki sa isang bahay sa Pasig City, kahapon ng madaling araw.
Kinilala ang mga napatay na sina Ranel Valenzuela, 51; German “Jing” Vidal, 40; Anthony “Tone” Quintana, 30; Christian “Pogpog” Camungol, 33; Johnson “Buyog” Miravales, 26; at si Alex Hongco, 31, mga nakatira sa Barangay Pinagbuhatan sa nasabing lungsod.
Sa imbestigasyon ni SPO2 Romeo Tanguilan ng Pasig City police, naganap ang krimen dakong alas-12:30 ng madaling-araw sa isang bahay sa 1st Narrat Street, Purok Acacia sa nabanggit na barangay.
Ayon sa police report, sinasabing nagpa-pot session ang mga biktima sa bahay ni Valenzuela nang dumating ang limang maskaradong kalalakihan saka isinagawa ang pamamaril.
Mabilis na tumakas ang gunmen sakay ang isang taxi na walang plaka.
Isang residente naman ang tumawag ng rescue team sa Brgy. Buting na rumesponde naman sina Caroline Calma, Matt Ferrer at Dr. Jefferson Bacalangco para isugod sa ospital ang mga biktima pero idineklarang patay.
Narekober ng mga tauhan ng Scene of the Crime Operations (SOCO) ang apat na plastic sachet na may shabu, 27 basyo ng bala ng hindi pa batid na kalibre ng baril at apat na live bullets.
Sa imbestigasyon ng pulisya, nabatid na matagal ng ginagamit na drug den ang nasabing bahay kung saan sinasabing ang mga biktimang sina Vidal, Hongco at Camungol ay kabilang sa drug watchlist ng nasabing barangay.
- Latest