Pinoy paddlers nagparamdam agad, 3 ginto sinagwan

MANILA, Philippines – Sumagwan agad ang Pinoy paddlers ng tatlong ginto at dalawang pilak na medalya sa 2016 Asian Dragon Boat Championships na ginaganap sa Baywalk area sa Puerto Princesa City, Palawan.

Pinagharian ng Pilipinas ang 20-seater men’s 500-meter standard boat event sa bisa ng isang minuto at 52.720 segundo para talunin ang Chinese-Taipei na nagtala ng 1:57.602 para magkasya sa pilak na medalya.

“Our paddlers won’t allow a close race like that to slip away. We’ve trained for almost a month on this course,” wika ni national team coach Diomedes Manalo.

Umariba pa ang Pinoy squad ng ginto sa 10-sea­ter junior mixed 500m small boat sa naitalang  2:10.387 kasunod ang pagkopo ng isa pang ginto buhat naman sa women’s 10-seater 200m small boat sa bilis na 54.453 segundo.

“It was the first that our women paddlers raced as a team in the 200m,” pahayag ni  Philippine Canoe Kayak Federation organi­zing committee chief Len Escollante.

Nakahirit din ang Pilipinas ng dalawang pilak sa men’s 500m small boat at women’s 500m small boat.

Target pa ng pambansang koponan na makahirit ng medalya sa ikalawang araw ng kumpetisyon.

Matapos ang Asian meet, aarangkada rin ang 2016 International Club Crew Championships kung saan sasabak ang matitikas na koponan mula sa iba’t ibang panig ng bansa laban sa mahuhusay n tropa mula sa Germany, Amerika, Chinese-Taipei, Thailand, Indonesia at Singapore.