Top V nakaipsot batok AFN Realtor sa Laba Tourney

CEBU, Philippines - Nagbangis ang higanteng si Alexam Amaga aron pangulohan ang opensa sa Top V nga midaog batok sa AFN Realtor, 87-80 sa LABA President’s Cup 2016 Second Conference basketball tournament niadtong Lunes didto sa Barangay Banilad gym, dakbayan sa Mandaue.

Si Amaga mikuhit og 18 puntos ug natakdan sab sa iyang kamangtas si Ramil Estremos nga misalida sab og maayo aron motampo’g 14 puntos.

Wala sab magpaperi si Cito Cañete nga miamot og 12 puntos ug Victor Pacquiao nga adunay 10 puntos.

Labaw ang Top V ni Tophe Villalon sa halftime, 43-35, apan ang AFN Realtor mi-rally sa third period sa pagpangulo nilang Barak Recto ug Merot Ygoña aron mapahakan ang labaw.

Nakasikit unta ang AFN Realtor, 75-77 sa nahabiling tres minutos sa fourth quarter, apan ang Top V milusad sa kaugalingon nila nga rally aron  bingaton og balik ngadto sa kuwatro puntos.

Gamay ra man tuod ang labaw, apan naprotihian gyud kini sa Top V hangtod sa katapusang pitik sa orasan.

Si Recto maoy topscorer sa AFN Realtor sa iyang 22 puntos, gisundan sa team manager niining si Arnold Pestaño nga adunay 16 puntos. Si Sonny Mingane miabuno og 13 puntos, samtang si Ygoña mitikdol og 11 puntos.

Sa laing aksiyon, ang Luke  Genesis mikulit sa ilang ikapitong sunod-sunod nga daog pinaagi sa paglubong sa Explorer, 102-80.

Sila si Jacob Cinco ug Allan Federez parehong mipaksit og 12 puntos aron pangulohan ang Luke Genesis nga wala pa’y pilde sa pito nila ka duwa.

Wala kaayo maglisud ang Luke Genesis sa  maong duwa gani ila gilubong ang Explorer sa halftime, 53-29.

Miamot sab og 10 puntos matag usa sila si Vincent Herbieto ug Ramie Suson sa maong kadaugan.

Ang Explorer gipangulohan ni Al Yamomo nga mikadlit og 30 puntos, gisundan ni Pedro Villarosa sa iyang 16 puntos ug Efren Yatan nga adunay 10 puntos.

Ubos sa bendisyon ni LABA president Gilbert Sebandal, ang liga gipadagan ni league commissioner Albert ‘Obeth’ Ramos inabagan nilang Lloyd Chavez, Adie Cinco ug Richard Limosnero.

Puntos matag usa

Unang duwa:

TOP V (87) – Amaga 18, Estremos 14, Cañete 12, Pacquiao 10, Sicad 8, Ceniza 7, Villalon  4, Arreglo 4, Cinco 4. D. Suico 3, Suico 2.

AFN REALTOR (80) – Recto 22, A. Pestaño 16, Mingane 13, Ygoña 11, Dawal 8, Cena 4, Tupas 3, Auman 3.

Ikaduhang duwa:

LUKE Genesis (102) – Cinco 12, Federez 12, V. Herbieto 10, Suson 10, Acusar 9, Lawas 8, T.  Herbieto 8, Barba 7, Landiza 6, Lara 6, Bartin 6, Alcontin 4, Tungal 4.

EXPLORER (80) – Yamomo 30, Villarosa 16, Yatan 10, Enriquez 8, Buliag 6, Comendador 4, Ancot 4, Lepon 2. (BANAT NEWS)