Garing naghari sa Seniors-B sa Consolacion Caging

CEBU, Philippines - Si Reynaldo Pardillo mikamada og 26 puntos sa dihang gibihag sa Garing ang Polog, 73-65 aron paglangkat sa korona sa inter-barangay seniors category B sa 6th Mayor Teresa P. Alegado Fiesta Basketball League didto sa Consolacion, Cebu.

Midugang og 14 puntos si Henry Villanca, samtang si Bimbo Boncales miamot og 10 puntos alang sa Garing, nga maoy mikontrolar sa duwa gikan sa pagsugod.

Human miposte og 26-23 nga labaw sa halftime, si Garing miratsada sa ikatulong kuwarter aron pag-inat sa ilang labaw ngadto na sa 10 puntos, 48-38.  Wala na makabawi pa sukad niadto ang Polog nga gipangulohan ni Anthony Tura bitbit ang 17 puntos. Sila  si  Emmanuel Pepito ug Junly Padayogdog nagkumboya og 28 puntos sa pilderong kawsa.

Ang mga duwa ubos sa superbisyon ni commissioner Paul Alelu Q. Flores, kanhi batos sa FEU Tamaraws uban ni PBA superstar Arwind Santos nga nakampiyon sa UAAP Season 68 niadtong tuig 2008.

Ang overall committee chairman sa maong usa ka bulan nga kalihukan mao si Liga ng mga Barangay President Roy Linaboc. Magsilbe niyang co-chairman mao sila si SB members Marilou P. Casul ug Benjamin ‘Boy’ Tibon.

Gipahigayon aron pagdugang og lamas sa tinuig nga selebrasyon sa pista sa Consolacion agi’g pagyukbo sa mahal nilang patron   San Narciso karong Oktubre 29, ang liga  gipaluyohan sa Consolacion LGU ubos sa pagpangu ni Mayor Teresa Alegado ug Vice Mayor Dr. Rey Damole uban nilang SB members JoyJoy Alegado, Nelia Ermac, Elenito Palang, Brando Cuizon, Victor Maglasang ug Alfie Ouano. (BANAT NEWS)