SSK abelgas, Horizon auto parts nakaipsot
CEBU, Philippines - Ang SSK Abelgas ug Horizon Auto Parts midaog batok sa tagsa-tagsa nilang kaatbang sa Bond of Master Basketball League 3rd Conference niadtong Martes didto sa Alta Vista gym sa Pardo, dakbayan sa Sugbo.
Ang SSK Abelgas mipukan sa MJE Inside Edge sa iskor nga 63-59, samtang ang Horizon Auto Parts mipilde sa Minute Burger, 80-72.
Ang kadaugan sa SSK Abelgas ug Horizon Auto Parts nakamugna og triple-tie uban sa MJE Inside Edge sa ikatulong dapit sa managsama nilang 3-4 records.
Sila si Echang Royeras ug CV Abelgas nagkumboya’g 36 puntos alang sa SSK Abelgas nga nakaipsot sa ligas nga duwa.
Ang MJE Inside Edge gipangulohan ni Erol Ibones pinaagi sa iyang 18 puntos.
Sa laing bahin, si Marvin Muñoz mitusak og 19 puntos aron pangulohan ang Horizon Auto Parts.
Sila si Ebit Nadela ug Dulf Antolijao mitampo’g 16 puntos matag usa, samtang si Aris Vilas miamot og 10 puntos.
Ang Minute Burger nga nangiwit sa standing sa ilang 1-6 nga baraha, gipangulohan nilang Anthony Alce ug Jun Jakosalem nga nagkumboya’g 30 puntos.
Ang liga namugna pinaagi sa paningkamot ni Jun ‘Master’ Tan ug sa tanang miyembro sa maong ballclub ug ang mga duwa gipadagan ni Edwin ‘Paw’ Dejacto Jr. (BANAT PALARO)
- Latest
