Pulis itinumba ng tandem
MANILA, Philippines - Isa na namang bagitong pulis ang pinagbabaril ng dalawang lalaki na sakay ng motorsiklo sa naganap na ambush kamakalawa ng gabi sa Muntinlupa City.
Ang biktima na binawian ng buhay habang nilalapatan ng lunas sa ospital ay kinilalang si PO1 Marlon Nofuente, 32, ng ML Quezon St., Brgy. Sucat ng nasabing lungsod dahil sa tama ng bala sa ulo at kanang hita.
Batay sa ulat, dakong alas-6:19 ng gabi sa kahabaan ng M. L. Quezon St., Purok 4, Brgy. Sucat ay naghihintay ang biktima ng masasakyang tricycle nang dumating ang isang kulay itim na motorsiklo na walang plaka na may angkas ang dalawang kalalakihan na kapwa nakasuot na kulay itim na jacket at helmet at agad na pinagbabaril ang biktima.
Mabilis namang isinugod ang biktima ng Sucat Rescue Team sa naturang ospital, subalit nasawi ito habang nilalapatan ng lunas.
Matatandaan, na noong Linggo ay pinagbabaril at pinatay din ang isang babaeng bagitong pulis sa Maynila.
- Latest
