Gipusil patay sa nagselos nga amigo

CEBU, Philippines - Wa na nakamata pa ang usa ka 31-anyos nga lalaki human kini gidul-itan sa pagpusil sa ulo samtang natulog sulod sa ilang balay diha sa Sitio Nava, Alaska, Mambaling ning Dakbayan sa Sugbo kagahapon sa buntag.

Giila ang biktima nga si Manolito Lucido, samtang gitudlo nga suspetsado sa kremin mao si Jesus Bedolido, alyas Jermy nga iya rang silingan ug suod nga higala.

Si Senior Police Officer 2 Wetzel Berry, imbestigador sa Homicide Section sa Cebu City Police Office nga nahinabi sa Banat News miingon nga sa inisyal nga pagsubay niya sa maong kremin, selos ang ilang nakita nga motibo.

Matud pa ni Berry nga ang suspetsado dunay ka-live-in ug kini nagselos sa biktima human kini nagduda dunay interes ang biktima sa iyang kapuyo.

Samtang natulog kini sa sulod sa ilang balay kalit lang misulod ang suspetsado ug dayon pusil sa tumong sa ulo.

Ang ig-agaw sa biktima nga si Rosel Callao miingon nga samtang kini nagluto og pamahaw iyang nabantayan nga misulod og kalit ang suspetsado nga nagdala og armas dayon namusil sa biktima.

Sulay pa unta nga gitabang sa mga sakop sa Cebu City Emergency Medical Services ang biktima apan nakabsan gayud sa kinabuhi samtang dali sab nga nakasibat sa maong dapit ang suspetsado.

Hangtod karon padayon nga gipangita sa kapulisan ang suspetsado nga gikatakdang pasakaan og kasong murder. - Jojo C. Ugdol ug Rowena Capistrano/EIM (BANAT NEWS)