Duga sa basura gireklamo

CEBU, Philippines - Tulo ka mga trak nga gipanag-iya sa Jomara Konstruck Corporation nga nanghakot sa basura gikan sa Cebu City padung sa Aloguinsan gipamulta sa City Environment and Natural Resources Office sa Dakbayan sa Carcar.

Matud ni Aida Alcontin ang pangulo sa Carcar City CENRO nga nahinabi sa Banat News ilahang gi-release ang tulo ka mga truck apan gipamulta ang tag-iya niini subay sa mando si Mayor Nicepuro Apura tungod sa kabaho sa mga trak nga molabay diha sa ilang siyudad padung sa Aloguinsan.

Gipamulta og P900 ang tulo ka truck base sa ilang  Solid Waste Ordinance apan kinahanglan nga dili na kini nila usbon nga magtulo-tulo sa karsada ang baho kaayong duga sa basura nga karga niini.

Malaumon si Alcontin, dili lang unta sila nga Local Government Unit ang molihok niini tungod kay dili ra man sila ang maagian sa mga basura.

Mibahad ang Carcar nga mopasaka og kaso kung wala gihapoy buhaton nga mga mitigating measures ang Jomara Kontruck Corporation.

Ang mga nitizens nga mga residente sa habagatan nga bahin sa probinsya sa Sugbo ang nipadangat usab sa ilang kasagmuyo sa social networking site nga makahasol kanila ang kabaho ug posibleng makadaut sa ilang panglawas.

Samtang ang Department of Public Services(DPS) sa Cebu City pinangulohan ni Roberto Cabarrubias miingon nga kinahanglang ang Jomara Konstruckt Corp. maoy mohimo og pamaagi isip service provider nga gikuha sa siyudad nga di manimaho ang karga niini.

Hinuon mosugyot kini kun sila magtigom karong adlawa nga papaliton og inoculant ang kompanya aron mawagtang ang kabaho sa basura apan dili ang siyudad ang mogasto niini. Nasayran nga duha ka landfill ang gilabayan karon sa Jomara sa mga basura ug kini mao ang landfill nga naa sa Lungsod sa Aloguinsan ug sa Consolacion.

Samtang si Talisay City Mayor Eduardo Gullas nagkanayon dili na lang niya pun-an ang problema sa Siyudad sa Sugbu kalabot sa basura niini isip maayong silingan.

Apan misaad ang mayor nga moaksiyon sila kun duna nay pormal nga reklamo apan sa pagkakaron wala pa sila nakadawat niini. - Rowena Capistrano, Decemay Padilla, ug Gabriel Bonjoc/EIM (BANAT NEWS)