Bata ang boyfriend
Dear Dr. Love,
Umaasa po ako na sana’y laging maganda ang araw ninyo. Tawagin n’yo na lang akong Lucie, 24 anyos. May kasintahan po ako na mas bata sa akin. Twenty years old lang siya.
Madalas kaming nag-aaway. Masyado raw akong mataray, suplada, isnabera.
Kung sa ugali ay wala akong maipipintas dahil napakabait niya. Pero isa siyang iresponsable. Hindi niya ginagawa ang kanyang responsibilidad bilang isang boyfriend. Inuuna niya ang kanyang mga katropa bago ako.
Kapag may gimik silang magkakabarkada ay nakakalimutan na niya ako. Minsan ay nagseselos na ako. Kapag magkasama kami, parang malamig ang pakikitungo niya sa akin. May problema pa po ako, may best friend siya na babae, isang teacher. Ang sweet-sweet nila at lagi silang umaalis, nanonood ng sine. Sa akin ay hindi niya ginagawa ang mga bagay na iyon.
Sana ay mabigyan po ninyo ako ng magandang payo o dapat gawin sa problema kong ito. Inaasahan ko po ang inyong kasagutan.
Lucie
Dear Lucie,
Nagtataka lang ako sa nabanggit mong teacher na kaibigan niya. Sinasadya ba niyang makipag-date para ikaw ay pagselosin? Kung magkagayon, bakit kaya pinagseselos ka niya sa pamamagitan ng pakikipag-date sa teacher na iyon?
Baka may nakikita siya sa iyo na ipinagseselos niya? Tingnan mo at pakasuriin ang iyong sarili. Better still, kausapin mo siya nang masinsinan. Alamin mo kung ano ang diperensiya mo na nakikita niya.
Talagang sa bawat relasyon ng magkasintahan o mag-asawa, kailangan ang komunikasyon. Tahasan mo ring sabihin sa kanya ang mga bagay na hindi mo naiibigan sa kanya. Sa gayo’y magkakaroon kayo ng pagkakataong mag-adjust sa isa’t isa.
Dr. Love
- Latest