Huwag ipilit ang sarili
Dear Dr. Love,
Kabilang po ako sa masusugid na tagasubaybay ng inyong kolum na Dr. Love, at nagpasyang sulatan kayo for the first time dahil sa isang problema sa puso.
Tawagin mo na lang akong Cesar, 22-anyos at binata. Matagal na akong nanliligaw kay Cristel. Mula nang makilala ko siya ay kakaibang ligaya ang nadama ko. Ngunit parang hindi niya siniseryoso ang pagtatapat ko ng pag-ibig sa kanya.
Kamakailan ay nagtungo ako sa kanila at nakilala ko ang kanyang mga magulang. Nauunawaan ko ang ama niya nang tanungin ako kung may asawa na ako. Sabi ko, wala pa.
Subalit nang makausap ko si Cristel ay sinabi niya sa akin na kalimutan ko na raw siya at ibaling ko na lang sa iba ang aking pagmamahal dahil ayaw daw ng mga magulang niya sa akin. Alam ninyo, nung marinig ko po iyon ay parang nawalan ng saysay ang aking buhay.
Cesar
Dear Cesar,
Ginagawa lang dahilan ng nililigawan mo ang kanyang mga magulang. Sa totoo lang, wala siyang gusto sa iyo.
Bakit mo ipagpipilitan ang sarili sa babaeng hindi naman nagmamahal sa iyo? Ganyan talaga sa panliligaw, hindi lahat nang magustuhan mo ay makukuha mo.
Masakit pero tanggapin mo ang totoo at humanap ka ng iba.
Dr. Love
- Latest