Dos Amores
Dear Dr. Love,
Hello po. Kabilang po ako sa ‘di mabilang na suki ng inyong column. Ni sa guniguni ay hindi ko naisip na isang araw ay magkakaroon ako ng problema at hihingi din ng payo sa inyo.
Please call me Ms. Double Minded na lang ng Pasay City. Ang problema ko po ay tungkol sa dalawa kong boyfriend.
Ang una kong boyfriend ay si Manny. One year and one month na po ang aming relasyon. Napakabait niya sa akin kahit na nalaman niyang hindi na ako virgin.
Habang on-going ang relasyon namin ay nagkaroon ako ng kaibigan, si Josh. Araw-gabi niya akong tinetext at hindi nagtagal ay nanligaw na siya sa akin. Inimbitahan niya akong mamasyal. Sumama ako at doon ko siya sinagot. Bale seven months na ang relasyon namin.
Mabait din po sa akin si Manny at gentleman din. Ang problema ko ay hindi niya alam na may boyfriend na akong iba. Alam din ni Josh na hindi na ako virgin at sa kabila noon ay minahal pa rin niya ako. Natatakot akong mawala siya dahil mas mahal ko siya kaysa kay Manny.
Problema ko rin ang mother ko kasi hindi niya alam na dalawa ang boyfriend ko. Si Manny lang ang alam niyang boyfriend ko at boto siya rito. Ayaw niya kay Josh.
Sa ngayon po ay tinitimbang ko sa sarili ko kung sino talaga sa kanilang dalawa ang mahal ko. Patuloy pa rin ang mga relasyon namin. Naguguluhan po ako kung sino sa kanilang dalawa ang dapat kong mahalin. Sana ay matulungan mo akong mag-decide.
Umaasa,
Miss Double Minded
Dear Miss Double Minded,
Kung ang mahal mo ay ang ikalawa mong boyfriend, makipag-break ka na sa una mong kasintahan. Huwag kang mamangka sa dalawang ilog at baka makarma ka.
Kahit mas boto ang nanay mo sa isa, ikaw ang dapat magpasya para sa sarili mo dahil sarili mong future ang nakataya.
Isa pa, unfair ka sa una mong nobyo dahil pinagtataksilan mo siya. Tutal, hindi ka pa kasal, puwede ka pang pumili sa kanilang dalawa.
Dr. Love
- Latest